JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR Lú Olo dekreta tan EE ba dahitu

PR Lú Olo dekreta tan EE ba dahitu

Prezidente Repúblika (PR), Francisco Guterres “Lú Olo” iha loron 27, fulan Outubru, tinan 2020 ne’e, liu husi komunikadu imprensa ne’ebé fó sai husi mídia Palásiu Prezidensiál dekreta tan Estadu Emerjénsia (EE) dahitu ba loron 30, hahú husi tuku 00.00 iha loron 4, fulan Novembru no termina iha tuku 23.59 iha loron 3, fulan Dezembru, tinan 2020.

Husi komunikadu ne’e afirma, EE sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualker pontu iha teritóriu nasionál no direitu ba rezisténsia. Autoridade públika kompetente sei impoin restrisoins nesesária ba redusaun risku hada’et nian no ezekuta medida prevensaun no kombate epidémia, hanesan distansiamentu sosiál, kuarentena ba suspeitu infesaun, izolamentu ba moras no suspeitu, konfinamentu domisiliáriu, uzu obrigatóriu máskara, fase-liman no distánsia fízika.

Enkuantu, PR dekreta EE hafoin Parlamentu Nasionál (PN) iha loron 27, fulan ne’e, fó autorizasaun ba renovasaun, antes ne’e membru Konsellu Superior Defeza no Seguransa (KSDS) no Konsellu Estadu (KE) iha loron 26, fulan Outubru, rekomenda ba PR atu hato’o mensajen ba PN husu autorizasaun ba renovasaun EE tuir pedidu husi Governu. Membru KSDS no KE hato’o opiniaun katak dalan di’ak liu kombate coronavírus mak prevensaun, tanba haree ba kapasidade paíz nian atu hatán ba propagasaun COVID-19.

Pedidu Governu ba estensaun EE ba danen ne’e, tanba haree ba evolusaun preokupante ba situasaun epidemiolójika no proliferasaun kazu rejistadu ho COVID-19 ne’ebé aumenta iha nível rejionál no nível mundiál.

Iha komunikadu ne’e salienta, dezde fulan Marsu, COVID-19 nu’udár moras importadu, nune’e Timor-Leste implementa kedas EE bainhira rejista kazu pozitivu ida. Implementasaun EE nu’udár medida preventiva no kontrolu COVID-19 atu hasees sidadaun hotu husi kalamidade públika, no Timor-Leste to’o oras ne’e rejista kazu pozitivu na’in ida, enkuantu dezde fulan Marsu, tinan 2020 to’o ohin loron, ema na’in 29 mak rekuperadu no laiha ema ida mak mate.

Uza máskara obrigatóriu iha fatin públiku

Governu liu husi Konsellu Ministru (KM), iha Kuarta, loron 28, fulan ne’e, aprova projetu dekretu Governu ne’ebé aprezenta husi Primeiru Ministru (PM), Taur Matan Ruak, kona-bá medida sira ezekusaun Estadu Emerjénsia (EE) nian ne’ebé renova tuir dekretu Prezidente Repúblika (PR).

Iha dekretu Governu ne’e ezekutivu haforte liu tan regra sira hanesan ema hotu iha obrigasaun atu utiliza máskara wainhira tama iha resintu públiku ka privadu. Mantein distánsiamentu pelu menus metru ida resin ho ema seluk no fase-liman wainhira hakarak tama ba estabelesimentu komersiál industriál no espasu públiku sira. Nune’e mós distansiamentu fizíku iha EE ba dahitu ne’e, la inklui distánsia sosiál iha família sira iha uma-laran.

“Medida ba EE dahitu ne’e kompara ho ida ne’ebé agora vijente hela, iha diferénsia uitoan, tanba ba EE dahitu ne’e ita sei impoin fali medida sira sanitáriu nian, hanesan distansiamentu fíziku, uza máskara ita tenke reforsa fali, tanba ho númeru kazu pozitivu ne’e kontinua aumenta iha nasaun viziñu sira. Ne’ebé ita labele husik halo mamar liu kedan medida sira saúde nian ”, Ministru Prezidénsia Konsellu Ministru (MPKM), Fidélis Leite Magalhães.

Alende ne’e regra EE dahitu ne’e sei halo ema sira ne’ebé haknaar-an iha setór petrolífera membru tripulasaun aeronáves bainhira tama Timor-Leste obrigatoriamente tenke tama kuarentena tuir diploma ministeriál Ministériu Saúde (MS) nian.

Iha regra ezekusaun ba deklarasaun EE períodu ida ne’e nafatin mantein kontrolu sanitáriu no kuarentena obrigatóriu ho durasaun loron 14 ba sidadaun sira ne’ebé hakarak tama-sai husi teritóriu nasionál.

Despeza sira ne’ebé relasiona ho izolamentu profilátiku sei responsabiliza husi individu ida-idak wainhira kumpre kuarentena iha estabelesimentu saúde nian, hela-fatin ka sentru izolamentu privadu.

Kontinua bandu pasajen fronteira terestre ba fins tradisionál ka kostumeiru sira no ne’ebé asesu ba merkadu reguladu sira, nafatin mantein sira-nia sansaun.

Regra EE ba dala ida ne’e mós regula mós estranjeiru sira ne’ebé tama iha teritóriu nasionál liu husi fronteira terestre tenke husu autorizasaun uluk.

Fó hanoin fali katak, EE ne’ebé renova ona sei abranje iha teritóriu nasionál tomak no vigora hahú husi tuku 00.00 iha loron 4, fulan Novembru no termina iha tuku 23.59 iha loron 3, fulan Dezembru, tinan 2020.

Durante períodu vijénsia EE lisensa autorizasaun atu administrativu no dokumentu sira hotu válidu nafatin la haree ba durasaun husi ninia prazu validade nian. oly/oct

Lee hotu :   MEJD sei esforsu selu saláriu profesór kontratadu ho OJE 2021

Add to Comments Here!!!!

error: Content is protected.
Secured By miniOrange
You might also like:
IPTL ezije ba PN-MJ altera lei kódigu sivíl

Igreja Protestante iha Timor-Leste (IPTL) ezije...

PR husu IPTL hametin paz no solidariedade iha Timor-Leste

Prezidente Repúblika (PR), Francisco Guterres "Lú...

PD: Governu tenke buka solusaun ba Timor-Oan servisu iha rai-liur

Reprezentante povu iha uma fukun Parlamentu...

Close