Ramos Horta: Joven tenke hatene hili área estudu

Laureadu Nobel da Paz, José Ramos Horta, husu ba juventude sira tenke identifika área estudu ne’ebé bele responde ba nesesidade merkadu traballu.

“Austrália kada vez presiza joven husi liur ba servisu iha ne’ebá, Japaun simu traballadór husi liur liu 500 mill, Korea du Sul mós presiza traballadór, Singapura mós ema lubuk ida, Alemaña, Inglatera, mais karik ba ho kursu ne’ebé kualidade, tenke hatene eletrisidade, hadia kareta, komputadór, kanalizasaun, ne’e bele hetan servisu la-lais no selu di’ak tebes, sé lori diploma doutoramentu filozófia ne’e, entaun ema la presiza”, Laureadu Nobel da Paz hato’o informasaun ne’e hafoin halo abertura ba atividade formasaun kona-bá lideransa ne’ebé realiza husi Rotary Youth Leadership Awards Timor-Leste (RYLA-TL) iha Unio Maloa Training Center, Segunda (05-10-2020).

Horta hateten, joven labele laran metin de’it ba diploma, tanba kompetisaun merkadu traballu iha estranjeiru agora ezije ema hotu hatene siénsia, tékniku profesionál, tanba ne’e, joven sira tenke hili área estudu ne’ebe bele fó benefísiu ba sira iha futuru.

“Estuda no estuda, labele estuda boso-bosok hodi hetan diploma, balun sosa tan diploma barak loos, la’ós Timor de’it, maibé Indonézia, Brazíl no rai barak iha mundu hetan diploma la hatene buat ida ou la hetan servisu, ba universidade ne’ebé akreditadu no iha kualidade no labele ema hotu ba de’it Sosiál Polítiku (SosPol), tanba ne’e fásil liu, kursu ne’e di’ak, mais buka liu tékniku profesionál”, tenik Laureadu Nobel da Paz ne’e.

Entretantu eis Prezidente Repúblika ne’e mós husu ba Governu atu bele halo programa espesiál ba juventude sira hanesan tratamentu saúde no kualidade edukasaun, hodi garante futuru nasaun. ida