MEJD rejeita informasaun estudante 3.417 la liu iha Ezame Nasionál

Koordenadór Nasionál Kurikulum, Pedro Gonçalves, hateten, informasaun ne’ebé oras ne’e virál iha públiku kona-bá estudante barak la liu ne’e laloos, tanba koreksaun Ezame Nasionál to’o agora seidauk remata.

“Iha loron 25, fulan Novembru, tinan 2020, mosu informasaun balun ne’ebé espalla iha média sosiál katak, primeiru iha estudante finalista hamutuk 3.417 ne’ebé la liu iha Ezame Nasionál, tanba fallansu iha sistema, segundu katak iha posibilidade iha tan Ezame Nasionál dalarua tanba finalista 56%, tanba error iha sistema wainhira funsionáriu sira halo koreksaun ba pontu sira ne’e haree ba informasaun sira ne’ebé espalla iha públiku mak Unidade Kurikulum Nasionál husi Ministériu Edukasaun Juventude no Desportu (MEJD), hanesan diresaun ne’ebé toma ba iha realizasaun liu husi biban ida ne’e hakarak klarifika katak, informasaun hirak ne’ebé sai antes data prevista ne’e laloos”, Koordenadór Nasionál Kurikulum ne’e liu husi konferénsia imprensa iha edifísiu MEJD Villa-Verde, Díli Kinta (26/11/2020).

Iha fatin hanesan, Xefe Gabinete MEJD, Raimundo José Neto, informa, sira sei lori prosesu ba oin, atu nune’e bele identifika autór ba públikasaun informasaun falsu ne’e.

“Orden señor Ministru dehan tenke hato’o karta keixa ba Polísia Sientífiku Investigasaun Kriminál (PCIC-sigla Português), portantu karta sai ohin ba ona PCIC para bele identifika irmão identidade ida ne’e, atu nia bele responsabiliza ninia liafaun sira ne’e”, dehan Raimundo.

Tuir dadus estudante hirak ne’ebé tuir Ezame Nasionál iha tinan ne’e hamutuk rihun 50 resin no tuir planu rezultadu ba Ezame Nasionál sei anusiu iha loron 18, fulan Dezembru, tinan 2020. jen