Xanana Gusmão kontinua apela sidadaun sira evita movimentu iha fronteira

Líder Karismátiku, Kay Rala Xanana Gusmão, kontinua apela ba sidadaun sira atu labele halo movimentasaun iha fronteira, tanba COVID-19 konsege halakon ona ema barak nia vida no sidadaun ne’ebe infetadu mós kontinua aumenta iha nível mundiál, maibé ho Maromak no lulik sira nia tulun Timor Leste seidauk rejista ema mate ba COVID-19.

”COVID-19 lori problema boot ba mundu, ita sorte boot seidauk iha, tanba ne’e mak ha’u nia preokupasaun la’o ba fronteira sira hodi ko’alia ho populasaun liu-liu joven sira, atu evita hakat fronteira liu husi dalan ilegál, hodi lori moras ne’e mai ita-nia rain, nune’e ita mate hanesan nehek”, Kay Rala Xanana Gusmão hato’o kestaun ne’e liu husi ninia vizita hodi halo asaun karidade ba misaun COVID-19 iha postu administrativu Remexio, Munisípiu Aileu, Sábadu (07/11/2020).

Xanana kompremitidu sei kontinua la’o haleu teritóriu Timor, hodi sosializa informasaun kona-bá COVID-19 ba komunidade sira, atu nune’e bele preve-an husi virus refere.

”Ha’u sei ba nafatin munisípiu atu sosializa informasaun ne’e, tanba iha mundu númeru infesaun COVID-19 kontinua aumenta, nune’e mós iha mundu seidauk iha ai-moruk ne’ebe própiu atu kura moras ne’e”, afirma Líder Karismátiku ne’e.

Alende ne’e, Xanana hamutuk ho madre Kongregasaun Canossiana no estudante Eskola Sekundária Santa Madalena Canossa Has-Laran, Díli, halo asaun karitativa hodi fó apoiu ai-han ba populasaun kbi’it-la’ek hamutuk na’in 40 resin, iha postu administrativu Remexio. ani