FMCS UNTL realiza judisium ba finalista 95

Universidade Nasionál Timor-Leste (UNTL) hala’o serimonia judisium no juramentu profisionál ba finalista na’in 95, husi Fakuldade Medicina Ciência Saúde (FMCS) no finalista hirak ne’e kompostu husi Departamentu Parteira hamutuk 59 no Medisina Jerál.

Reitór UNTL Interinu, Francisco Miguel Martins, apela, ba finalista sira hodi kaer metin étika servisu profesionalizmu, nune’e bele serví nasaun no kuidadu povu nia saúde ho di’ak.

“Sira ne’ebé finaliza ona estudu iha eskola superiór ida ne’e hala’o profesionalizmu ho di’ak atu serví povu no kuida povu nia saúde, ne’ebé resposabilidade morál no étika ba sira boot tebes hodi asegura sira-nia vida servisu moris loro-loron nian”, Reitór UNTL Interinu ne’e iha salaun Delta Nova, Díli, Kinta (20-12-2020).

Reprezentante finalista, Nivia de Pina Sarmento Seran, hateten, rezultadu estudu ne’ebé finaliza ona to’o iha faze judisium sai hanesan referénsia, hodi bele kontinua estudu no hadi’a-an di’ak liu tan iha futuru.

“Rezultadu ne’e sai referénsia hodi guia ami hakat ba oin no kontinua estuda, tanba edukasaun la hotu de’it iha ne’e no kontinua aprende iha fatin ne’ebé de’it, partikularmente ho juramentu ne’e sai hanesan responsanbilidade hodi halo servisu profesionál, sakrifísiu mak ohin loron hetan futuru ne’e”, tenik nia.

Iha serimonia ne’e FMCS UNTL mós entrega lista médiku no parteira foun sira hodi envolve iha Asosiasaun Médiku Timor-Leste (AMTL) no Asosiasaun Parteria Timor-Leste (APTL), inklui entrega dadus medisina no parteira foun sira ba Ministériu Saúde.

Tuir planu finalista hirak ne’e sei kontinua halo graduasaun ba atribuisaun diploma iha loron 12, fulan Janeiru, tinan 2021. ida