MS sei sosa vasina kontra Covid-19 husi nasaun seluk

Vise-Ministru Saúde, Bonifácio Maukoli dos Reis, iha segunda (21-12) aprezenta informasaun ba Konsellu Ministru sira kona-ba esforsu Governu nian ba akizisaun vasina kontra COVID-19 no mós kona-ba planu distribuisaun vasina iha Timor-Leste.

Bonifácio Maukoli hateten Governu realiza esforsu tomak ne’ebé nesesáriu, ho apoiu parseiru dezenvolvimentu nian atu haree ba akizisaun vasina kontra COVID-19 no mós ba preparasaun planu ida ba introdusaun no distribuisaun vasina iha Timor-Leste.

 “Iha inisiu tinan oin semana ida ka rua tuir mai Ministériu Saúde sei aprezenta proposta kompletu ida konaba medida sa ida maka sei halo rekursu sa ida maka Governo tenki halo atu bele assegura katak ita nia sidadaun sira bele hetan vasina ne’e, wainhira vacina ne’e disponível ona mai ita. Ne’ebé wainhira Ministra Saúde pronta ona ho nia proposta ne’e sei mai hato’o iha Konsellu Ministru iha Presidénsia Konsellu Ministru no sei lori ba iha reuniaun Konsellu Ministru hodi bele halo deliberasaun ida nune’e plano no medida hirak relasiona ho atu oinsa halo akisisaun ba iha vacinas no aplika sei sai polítika ida ne’ebé mai husi desisaun deliberasaun Governo tomak nian”, hateten Ministru Presidénsia Konsellu Ministru, Fidélis Magalhães.

To’o oras ne’e iha mundo  nasaun sira hanesan Estadus Amérika, Reino Unido, Baharein, Arabia Saúdita no Kanadá  aprova ona sira nia vasina kontra Covid-19 no komesa ona halo vasinasaun ba sira nia populasaun.Oct