COVID-19: TL rejista hikas kazu foun ida, na’in 19 baixa

Koordenadór Pilár VII COVID-19, Nilton do Carmo da Silva, hateten, Timor-Leste (TL) rejista hikas kazu konfirmadu COVID-19 ida (1), nu’udár Timor-oan ne’ebé antes ne’e hala’o prosesu kuarentena iha Batugade, nune’e pasiente pozitivu COVID-19 ne’ebé baixa iha fatin izolamentu Vera Cruz hamutuk 18 no na’in ida (1) iha fatin izolamentu Rejiaun Administrativa Espesiál Oe-Cusse Ambeno (RAEOA).

“Pasiente ne’e mane ho idade 49, nu’udár sidadaun Timor-oan ne’ebé tama dalan legál nu’udár funsionáriu públiku, servisu iha Kupang, dia 27 ita foti Swab no rezultadu hatudu konfirmadu pozitivu COVID-19 no ekipa husi Pilár VII no ambulánsia muda ona ba Vera Cruz”, Koordenadór Pilár VII COVID-19 ne’e liu husi konferénsia imprensa iha Palaçio das Cínzas Caicoli-Díli, Sábadu (30-01-2021).

Istória ba kronolojia pasiente ne’e hahú husi loron 15, fulan Janeiru, tinan 2021, pasajeiru husi Kupang-Indonézia mai TL liu husi pontu entrada Batugade, munisípiu Bobonaro. Pasajeiru ne’e nu’udár Adidu Imigrasaun servísu iha Konsuladu Kupang-Indonézia.

Iha loron ne’ebé pasajeiru ne’e nia tama mai ekipa liña frente submete kedas ba kuarentena Batugade. No iha loron 27, fulan Janeiru, tinan ne’e, ekipa vijilánsia Pilár III Servisu Saúde Munisípiu Bobonaro hasa’i teste Swab no iha loron 29, fulan Janeiru ne’e, rezultadu teste laboratóriu hatudu katak, sidadaun ne’e pozitivu COVID-19.

Liu husi konferénsia ne’e, Koordenadór Pilár VII COVID-19 ne’e mós informa, Ministériu Saúde (MS) fó sai hikas pasiente rekuperadu COVID-19 na’in ida (1) mane ho idade 48 husi sala izolamentu Vera Cruz-Dili, hodi fila ba nia família no nia komunidade.

Maluk ne’e Timor-oan, iha loron 2, fulan Janeiru, maibé odamatan boot fonteira Mota-Ain taka, nune’e sidadaun ne’e deside tama mai teritóriu Timor liu husi dalan ilegál, nune’e Polísia Unidade Patrullamentu Fronteira (UPF) kaptura no lori tama kuarentena iha Batugade. Iha loron 13, fulan Janeiru, sidadaun refere konfirmadu COVID-19 no baixa iha izolamentu Vera Cruz to’o ohin (30/1) loron no agora ekipa fó alta ona.

Entretantu dau-daun ne’e, númeru kazu konfirmadu iha TL hamutuk 19, baixa hela izolamentu Vera Cruz hamutuk 18 no Rejiaun Administrativa Espesiál Oe-Cusse Ambeno (RAEOA) na’in ida (1).

MS prepara otél lima

Koordenadór Pilár VII COVID-19, Nilton do Carmo da Silva, hateten, iha ona otél lima (5) mak halo kontratu, hodi hatán ba opsaun rua ne’ebé Governu fó hodi fasilita sidadaun ba fatin kuarentena.

Nilton do Carmo da Silva hato’o informasaun ne’e relasiona ho medida Governu nian bandu sidadaun sira ne’ebé mai husi estranjeiru durante Estadu Emerjénsia (EE) dasanulu, hodi halo auto kuarentena, maibé fó opsaun rua hodi hili prosesu kuarentena.

Opsaun sira ne’e mak hanesan hili fatin kuarentena ne’ebé Governu mak fasilita ou hili kuarentena iha otél sira ne’ebé Governu kontratu ona.

“Iha otél lima (5) mak iha kontratu hanesan husi Otel YQ, Leokase, Time Square, Novo Horizonte no Hotel Vila Verde, maibé númeru ne’e sei iha mudansa, depende ba númeru sidadaun sira dalaruma sa’e ou tun”, Koordenadór Pilár VII COVID-19 ne’e liu husi konferénsia imprensa iha Palaçio das Cínzas, Sábadu (30-01-2021).

Nia hateten, desizaun Govenru hodi hapara prosesu auto kuarentena sei hafásil servisu ekipa saúde hodi halo kontrolu, tanba rekursu umanu la sufisiente, nune’e mós hanesan meius ida hodi reduz risku ba transmisaun COVID-19.

Entretantu totál sidadaun ne’ebé kontinua kumpre prosesu kuarentena hamutuk 230 no auto kuarentena hamutuk 193.

EE ne’ebé dau-daun ne’e renova ona abranje teritóriu nasionál tomak no vigora entre oras 00.00, loron 2, fulan Fevereiru, tinan 2021 to’o oras 23.59, loron 3, fulan Marsu, tinan 2021. ida