Simu estudante husi munisípiu, Diretór 4 de Setembro konsidera la kontra sirkular

Ministériu Edukasaun Juventude no Desportu (MEJD), liu husi Diresaun Edukasaun Munisípiu Díli, hasa’i ona sirkular hodi limita estudante hotu ne’ebé remata terseiru síkulu iha munisípiu atu kontinua ensinu sekundáriu iha kapitál Díli, maibé realidade eskola balun iha Díli laran kontinua kontra sirkular refere.

Diretór Eskola Sekundáriu Jerál 4 de Setembro, Sergio da Cruz, hateten, maske sirkular ne’e fó sai ona, maibé tanba haree ba situasaun husi enkaregadu sira nian mak nia kontinua simu estudante hirak ne’e.

“Ha’u bele dehan ne’e la signifika kontra regra, mas nafatin ha’u fila-fali ba razaun ne’ebé bele dehan regra ne’e sempre hakru’uk ba regra, mas ita haree fila-fali ba situasaun de’it, agora karik ita haree ba ema ne’ebé tebes duni ita hanesan edukadór, hanesan ha’u karik, hanesan ema edukadór ida ema mai ho ema nia argumentu ida ne’ebé forte ne’e nu’udár edukadór ha’u tenke tetu, nu’udár edukadór nia barani atu responde problema ne’ebé estudante sira hasoru”, Diretór Eskola Sekundáriu Jerál 4 de Setembro ne’e ba GMN, Kinta (7/01/2021), iha Balide-Díli.

Diretór Edukasaun Munisípiu Díli, Duarte Bragança, informa, sira sei fó sansaun ba eskola hirak ne’ebé kontra ona sirkular refere.

“Eskola sira ne’e ita hatete katak sei iha sansaun ba sira, sansaun administrativu hanesan funsionáriu públiku tenke obedese, hatudu sira-nia loyalidade ba superiór, tanba ne’e desizaun koletiva, la’ós desizaun Diretór Edukasaun Munisípiu DÍLI, lae?, desizaun Diretór Eskola sira nian ne’e desizaun konjunta ne’ebé ami halo hamutuk, ami sempre foti desizaun ami hamutuk tiha mak ha’u fó sai sirkular ne’e, ita hot-hotu servisu tenke kumprw desizaun ne’e”, informa Duarte.

Diretór Edukasaun Munisípiu Dili ne’e mós husu ba Diretór Eskola hotu atu kontinua tuir sirkular ne’ebé iha ona, nune’e hamutuk bele hadi’a kualidade edukasaun iha munisípiu Díli no tuir informasaun sirkular refere fó sai iha loron 18, fulan Dezembru, tinan 2020. jen