MS deteta tan Timor-oan na’in tolu pozitivu COVID-19

Ministériu Saúde (MS) liu husi Komisaun Nasionál COVID-19 rejista tan Timor-oan na’in tolu (3) konfirmadu pozitivu COVID-19.

Timor-oan na’in tolu (3) ne’e kompostu husi feto ida (1) no mane rua (2), husi sira na’in tolu (3) ne’e na’in ida (1) sidadaun bai-bain no na’in rua (2) nu’udár estudante.

“Sira na’in 3, feto ho idade 21 no mane ida ho idade 22 no ida seluk 29. Sira na’in 3 laiha sintoma. Pasiente idade 21 antes ne’e hela iha Konventu balun iha Kupang-Indonézia Osidentál no mane idade 22 nu’udár estudante iha universidade balun iha Bali. Sira mai husi Indonézia husi provínsia ne’ebé la hanesan, iha loron 20, fulan Janeiru, tinan 2021, sira tama Timor-Leste liu husi pontu entrada Batugade hamutuk ho pasajeiru na’in 118. Sira kumpre kuarentena obrigatóriu iha otél Novo Horizonte”, Koordenadora Pilár III COVID-19, Josefina Clarinha João hato’o informasaun ne’e liu husi konferénsia imprensa iha salaun enkontru Palaçio das Cínzas, Caicoli-Díli, Kinta (04-02-2021).

Koordenadora Pilár III COVID-19 ne’e hatutan, ekipa vijilánsia epidemiolójika ba halo teste Swab dahuluk  iha loron 21, fulan Janeiru ho rezultadu teste negativu, teste daruak foti iha loron 1, fulan Fevereiru no iha loron 3, fulan Fevereiru, rezultadu laboratóriu hatudu katak sidadaun na’in rua ne’e pozitivu COVID-19.

“Horikalan Ekipa Jestaun Kazu husi Pilár VII evakua ona pasiente na’in rua ne’e ba sala izolamentu Vera Cruz, Dili”, tenik Josefina.

Iha biban ne’e, nia informa mós katak, mane ida ho idade 29, iha loron 20, fulan Janeiru, tinan 2021, sai husi Salele, munisípiu Covalima ba Atambua Indonézia liu husi dalan ilegál no iha loron 22, fulan Janeiru, nia deside fila mai Timor liu husi Malaka no tama nafatin liu husi dalan ilegál parte Salele nian.

“Iha loron 22 ne’e kedas Polísia Patrullamentu Fronteira (UPF) kaptura no lori ba submete iha kuarentena. Ohin (4/2) Ekipa Vijilánsia ba foti amostra Swab no rezultadu teste hatudu katak sidadaun ne’e pozitivu COVID-19. Dau-dauk ne’e ekipa prepara ona atu transporta mai sala izolamentu Vera Cruz, Díli”, dehan Koordenadora Pilár III COVID-19 ne’e.

Entretantu dau-daun ne’e iha kuarentena Suai iha ema na’in 16 mak kumpre hela kuarentena, na’in 15 nu’udár ekipa servisu hanesan médiku, enfermeiru, pesoál limpeza no seguransa.

Tuir dadus husi MS hahú husi loron 4, fulan Fevereiru, tinan 2021, sidadaun sira ne’ebé hein rezultadu teste hamutuk 55, kumulativu kazu 80, atuál baixa hamutuk 27 (Díli: na’in 26 no na’in 1 iha RAEOA). eni