MS rejista tan pozitivu COVID-19 na’in 14

Ministériu Saúde (MS) rejista tan kazu pozitivu COVID-19 na’in 14, ho aumentu ne’e, totál pasiente COVID-19 ne’ebá dau-daun ne’e baixa iha fatin izolamentu Sentru Saúde Vera Cruz na’in 38.

“Ohin Komisaun Nasionál rejista tan kazu konfirmadu pozitivu COVID-19, kompostu husi feto na’in 8, no mane na’in 6”, Koordenadora Jerál Komisaun COVID-19, Odete da Silva Viegas, liu husi konferénsia imprensa iha salaun MS, Caicoli-Díli, Kinta (11/02/2021).

Koordenadora Jerál Komisaun COVID-19, informa, númeru konfirmadu pozitivu COVID-19 aumenta tan ema na’in 14, nune’e atuál baixa iha sala izolamentu Vera Cruz 37 no ida seluk iha RAEOA.

Pasiente pozitivu COVID-19 na’in 14 ne’e, ema na’in rua (2) sidadaun estranjeiru no Timor-oan na’in 12, ema sira ne’e idade 20 to’o 45. 

Odete esplika, sidadaun Timor-oan pozitivu COVID-19 ne’e ekipa vijilánsia MS identifika, hafoin fila husi Indonézia iha loron 20, fulan Janeiru ne’e, liu husi pontu entrada Batugade hamutuk ho pasajeiru 118.

Entre na’in 14, ema na’in ida (1) nu’udár médiku ne’ebé durante ne’e halo atendimentu iha kuarentena otél Time Square, Díli.

Pasiente pozitivu COVID-19 hirak ne’e tama Timor-Leste, wanhira halo  viajen husi Atambua-Indonézia mai Timor, liu husi pontu entrada Batugade no ekipa liña frente simu no submete ba konfinamentu iha Batugade, munisípiu Bobonaro. tos