OMS rekomenda TL uza vasina AstraZeneca

Organizasaun Mundiál Saúde (OMS) rokomenda ba Governu Timor-Leste (TL) uza vasina kontra COVID-19 ho tipu AstraZeneca, maske iha tipu vasina kontra COVID-19 tolu (3 ) hanesan AstraZeneca, Pfizer-BioNTech no Moderna.

Reprezentante OMS, Arvind Mathur, hateten, nia parte halo ona enkontru ho Primeiru Ministru (PM), Taur Matan Ruak, hodi diskute planu introdusaun vasina COVID-19 iha TL, deside tipu vasina ne’ebé introdus, inklui ko’alia kona-bá oinsa haforsa planu estratéjia hasoru COVID-19.

“OMS hato’o ona evidénsia sientífika kona-bá tipu de vasina Pfizer, Moderna no AstraZeneca, ohin OMS hato’o ona diferénsia tipu vasina 3 ne’e, bazeia ba ninia efikasia, seguransa no sistema nasaun nian prepara hodi simu vasina ne’e, informasaun ho klarifikasaun no justifikasaun ba vasina hirak ne’e fó ona no bazeia ba fatór 3 ne’ebé ha’u temi ona informasaun no evidénsia a favór liu ba AstraZeneca ne’ebé bele sai preferénsia ba vasina”, Reprezentante OMS iha TL ne’e ba jornalista sira iha Palásiu Governu, Sesta (12-02-2021).

Arvind klarifika, maske OMS fó ona rekomendasaun, maibé atu foti desizaun ba tipu vasina ne’ebé prefere liu, sei mai husi Governu TL rasik.

“Hanesan ha’u hatete ona, ami nia regra mak hodi fornese evidénsia no informasaun sira, PM, Ministériu Saúde no Konsellu Ministru mak sei foti desizaun finál”, tenik Reprezentante OMS iha TL ne’e.

Vasina AstraZeneca ne’e rasik distribui ona ba nasaun 100 resin, liu husi plataforma COVAX ne’ebé lidera husi OMS no Global Alliance for Vaccines and Immunisation (GAVI).

Maske nune’e, PM, Taur Matan Ruak, liu husi entrevista ne’ebé hala’o iha Palaçio Presidencial, Bairro Pite, Kinta semana ne’e, deklara, Governu TL seidauk deside uza vasina AstraZeneca, tanba sei iha dúvida no presiza rekolla informasaun tan. ida