Sidadaun estranjeiru na’in neen pozitivu COVID-19

Ministériu Saúde (MS) liu husi Komisan Nasionál COVID-19, rejista tan sidadaun estranjeiru na’in neen (6) pozitivu COVID-19, ne’ebé kompostu husi feto haat (4), mane na’in rua (2) no husi númeru ne’e inklui labarik ida ho idade tinan tolu (3).

“Atualiza kazu pozitivu foun COVID-19, ohin loron 9, fulan Fevereiru, tinan 2021, husi komisaun nasionál rejista tan ema na’in 6 ne’ebé konfirmadu pozitivu COVID-19, husi na’in 6 ne’e sidadaun estranjeiru hotu. Sira asintomátiku ka laiha sintoma, signifika hanesan isin-manas, me’ar ka kakorok-moras laiha. Pasiente na’in 6 ne’e kompostu husi feto 4 ho idade 61, 45 no na’in 2 idade hanesan (34). Mane na’in 2 ne’e na’in 1 ho idade 53 no ida seluk labarik tinan 3. Sidadaun na’in 5 ne’e nu’udár família ida, iha loron 28, fulan Janeiru, tinan 2021, sira halo viajen husi Jakarta, Indonézia mai Kupang ho Garuda Airlines, iha loron 29 sira kontinua viajen mai Atambua no iha loron 30, fulan Janeiru sira tama Timor-Leste liu husi pontu entrada Batugade. Iha Díli sira iha auto kuarentena iha White Sands Resort & Residence”, Koordenadora Jerál Komisaun COVID-19, Odete da Silva Viegas hato’o informasaun ne’e liu husi konferénsia imprensa iha salaun enkontru Palaçio das Cínzas, Caicoli-Díli, Tersa (09-02-2021).

Koordenadora Jerál Komisaun COVID-19 ne’e relata katak, iha sidadaun feto ne’ebé hala’o viajen husi Betun-Atambua, Indonézia no mai Timor-Leste tama liu husi dalan ilegál área Batugade no aluga motor lori liu mai iha Díli.

“Iha feto 1 ne’ebé ho idade 34, iha loron 28, fulan Janeiru nia mai husi Betun-Indonézia ba Atambua no kontinua mai Timor-Leste. Nia tama liu husi dalan ilegál área Batugade nian, iha Batugade nia aluga motor (ojek) lori nia mai liu Díli. To’o iha família nia uma iha Beto-Comoro la konsege halo kontaktu ho família, tanba nia tur iha liur no biban ne’e família kontaktu kedas parte vijilánsia MS bá foti nia lori ba fatin kuarentena. Sidadaun ida tama ilegál ne’ebé ho ojek ne’e sira-nia teste Swab foti iha loron 8, fulan Fevereiru no rezultadu pozitivu COVID-19 relata iha loron 8, fulan Fevereiru loraik no totál pasajeiru ne’ebé kuarentena iha Tibar hamutuk ema 23”, tenik Odete.

Tuir nia, ema ida ne’ebé tula sidadaun tama ilegál ho motorizada, dau-daun ne’e ekipa vijilánsia MS hala’o hela investigasaun.

Dadus husi MS hahú husi loron 9, fulan Fevereiru, tinan 2021, kumulativu teste 19691, hein rezultadu 115, kazu foun 6, kumulativu kazu 86. Atuál baixa  29 (Vera Cruz: 28, RAEOA: 1), kumulativu negativu 19496, kuarentena 288 (Díli: 170, munisípiu: 118), auto kuarentena 123 (Díli: 97, munisípiu: 26) no pasa ona loron 14 hamutuk 7732. eni