COVID-19 iha Díli aumenta ba 47, atuál baixa 76

Koordenadór Forsa-Tarefa ba Prevensaun no Mitigasaun SurtuCovid-19, Rui Maria de Araújo, hatete, Ekipa Konjunta Saúde Munisípiu Díli, deteta tan kazu konfirmadu  foun hamutuk 11, nune’e kazu iha Díli aumenta ba 47, no dadaun ne’e ema ne’ebé baixa iha Sala Izolamentu Vera Cruz no Sala Izolamentu Tasi-Tolu hamutuk 76.

“Progresu atividade prevensaun no mitigasaun surtu Covid-19 iha munisípiu Díli Hosi horiseik mai ohin iha Dili, amostra ne’ebé rekolla iha atividade buka tuir kontaktu-besik, iha tan kazu positivu nain 11, ho detalles hanesan tuir mai, Kazu pozitivu 1 hosi Aldeia 4 de Setembru, Suku Comoro, Postu Administrativu Dom Aleixo, Munisípiu Díli. Pozitivu ida ne’e kontaktu besik ho kazu iha cluster Ministériu Transportes e Comunicações (MTC), Kazu pozitivu 4,hosi Aldeia Frekat, Suco Bairro Pité, Postu Administrativu Dom Aleixo, Munisípiu Díli. Pozitivu ida ne’e kontaktu-besik ho kazu ida iha cluster Ministeriu Finanças. Kazu pozitivu nain 4, profisionál saúde ne’ebé halo formasaun Emergency Obsterics and Neonatal Care (EMONC) iha HNGV. Sira kontaktu-besik ho profisionál saúde ida ne’ebé mós halo formasaun hanesan iha HNGV, ne’ebé anunsia pozitivu iha dia 10 de Marsu. Hamutuk hotu sira nain 5 ne’ebé tuir formasaun EMONC no detetadu nu’udar kazu pozitivu, la’os servisu iha HNGV, maibé nu’udar kontaktu-besik hosi profisional saúde ida ne’ebé pozitivu iha dia 9 de Marsu. Kazu pozitivu 2, rezultadu husi vijilánsia sentinela iha Sentru Saúde Formoza (1 hela iha aldeia mate restu, Vila Verde, 1 iha Fatuhada) Ho nune’e, kazu detetadu ka pozitivu iha Dili  husi dia 7 de Marsu to’o ohin,hamutuk hotu 47”, Rui hato’o informasaun ne’e liuhosi konferensia ba Imprensa iha sala Situasaun Jestaun Krize Sesta (12-03-2021).

Rui informa, Ho baze ba informasaun foun ne’ebé ekipa konjunta saúde nian rekolle, foku/agrupamentu/cluster kazu pozitivu iha Díli, hetan revizaun hanesan tuir mai BTN II-Terra Santa, Suku Madohi kazu 6. Aldeia Gólgota, Madohi kazu 3. Aldeia Lurumata, Suco Madohi kazu 2. Aldeia 4 Setembru, Comoro: kazu 2. Aldeia Fomento I, Suku Comoro kazu 3. Aldeia 05, Suku Fatuhada kazu 3. Bebonuk kazu 2. Delta kazu 1. Aldeia Frekat, Suku Bairru-Pité 3 (cluster foun) Ministériu Finansas kazu 3, SEFOPE kazu 9. Ministério Transportes e Comunicação kazu 2. EMONC (Emergency Obstetrics and Neonatal Care) training/Hospital Nacional Guido Valadares kazu 5. Formoza kazu 2. Kazu 47 ne’e fahe ba cluster 14, namkari iha instituisaun 3, eventu 1 no Suku 6 iha Postu Administrativu Dom Aleixo, no mos Postu Administrativu Vera Cruz.

“Aproveita esplika ba populasaun katak, dadus ne’ebé iha relasiona ho HNGV, hatudu katak seidauk iha profisionál saúde seluk tan, ne’ebé servisu iha HNGV,maka hetan kontájiu husi kazu pozitivu ida ne’ebé anunsía iha loron  9 de Marsu. Sira hotu ne’ebé iha kontaktu-besik ho kazu ida ne’e,halo hotu test ona, no iha hotu ona kuarentena. Kontájiu ne’ebé akontese iha unidade pediatria & maternidade ninia hun mai husi liur, no seidauk hatudu katak naklekar ba unidade seluk iha hospital nia laran. Maski nune’e, dirijente sira iha HNGV, hahú reduz ona prestrasaun asisténsia médika ne’ebé la’os espesializada,iha area maternidade no pediatria,durante loron 3 nia laran, tuir protokolu kontinjénsia hospital nian rasik. Servisu sira seluk, hanesan emerjénsia, konsulta ambulatória, no servisu iha area espesializada seluk, nafatin funsiona hanesan baibain,” Rui esplika.

Tuir Rui katak, progresu hosi atividade prevensaun no mitigasaun surtu covid-19 iha Munisipiu Covalima. Atividade iha Suai vila, no postu administrativu sira, eseptu Fatumea la’o normal, hahú kedas horiseik

“Ekipa konjunta saúde horiseik foti kedas amostra husi kontaktu-besik kazu pozitivu 2 ne’ebé anunsía horiseik. Rezultadu hatudu negativu, maibé sei presiza negative dala 1 tan, atu bele deklara livre husi kontájiu. Sentru Saúde sira iha Munisipiu Covalima, ho mós Hospitál Referénsia Suai, nafatin hala’o atividade vigilánsia sentinel,” Rui komenta.

Iha biban ne’e Dr Rui afirma katak, progressu atividade prevensaun no mitigasaun surtu Covid-19 iha munisípiu sira seluk no RAEOA. Ekipa konjunta saúde iha Munisípiu Baucau buka-tuir kontaktu-besik hosi kazu pozitivu iha Díli, hasai amostra lori mai análize iha laboratóriu. Kontaktu-besik ida tenki lori mai kuarentena iha Díli.

Iha oportunidade ne’e mos Rui informa katak, esplikasaun adisionál 1. Fo’o hanoin ba populasaun katak, Rezolusaun Governu Nº12/2021, 8 de Marsu kona-ba serka sanitaria iha Munisipiu Dili, proibi ema atu tama sai husi Dili. Hotu-hotu tu’ur hakmatek iha fatin. Autoridade ne’ebé bele autoriza ema nia movimentu maka Brigadeiro General Aluk, Diretor Centro Integrado Gestão de Crises.Resolução Governo ne’e mós obriga sidadaun hotu iha sidade Dili, atu halo konfinamentu domisiliáriu jeral. Ida ne’e signifika, hela iha uma, labele sai. Sai deit wainhira presiza tamba moras, hola hahán, ou sira ne’ebé halo servisu esensiál

“Hakarak mós informaba publiku katak ema barak sirkula informasaun iha rede social sira,kona-ba kazu pozitivu ne’ebé graveno ‘’hein deit ona’’. Balun fali sirkula fotografia ema halo sermonia funeral, hodi dehan‘’rate metinaro ohin resmi hakoi covid na’’. Balun fali nafatin sei ‘’deskonfia’’ katak moras Covid-19 la ziste, Governu maka politiza, no seluk tan. Iha situasaun Pandemia iha fatin hot-hotu, mosu mós fenómenu ne’ebé matenek nain sira hanaran ‘’infodemia’’, katak informasaun barak demais, no informasaun ne’ebé la informa, maibé ‘’dezinforma’’ no buka atu kuda dúvida, hamosu deskonfiansa, no halo tauk ema. Autoridade estadu nian ne’ebé servisu loron no kalan atu prevene & mitiga surtu COvid-19 iha Timor-Leste, komprometidu atu nafatin hato’o informasaun ne’ebé lo’os no faktual kona-ba buat hotu relasiona ho Covid-19, liu husi konferénsia imprensa regular. Sei la subar buat ida, sei hato’o informasaun hotu ba Povu, tamba ita hotu hamutuk iha batalla ida ne’e. La iha razaun atu subar buat ida, tamba la iha duni buat ida atu subar,” hatete Rui.eni

Leave a Reply

Your email address will not be published. Required fields are marked *