EE ba Da-XII sidadaun bele kuarentena iha uma de’it

Medida Estadu Emerjénsia (EE),ba dala Sanulu Resin rua (XII) nian, sidadaun sira bele kuarentena iha uma de’it, maibé tenki ho despaisu Ministériu Saúde (MS) nian.

Reuniaun Estraordinária, Konsellu Ministru iha Segunda (29/03), ne’e aprova projetu Dekretu Governu, ba alterasaun dahuluk Dekretu Governu Númeru 6/2021, loron 2, fulan Marsu, kona-ba medida Estadu Emerjénsia, ne’ebé efetua husi Dekretu Prezidente Repúblika, númeru 15/2021, loron 1 fulan-Marsu, tama iha vigór to’o tuku 23:59 iha loron 2 fulan-abril tinan 2021.

Ho alterasaun ne’e, aplika izolamentu terapéutiku iha uma, maibé tenki tuir despaisu fundamentadu, hosi Ministra Saúde.

No despeza sira relasionada, ho izolamentu profilátiku tulun husi individu ida-idak nian, bainhira kumpre ona iha estabelesimentu saúde, rezidénsia ka iha sentru izolamentu privadu sira.

Governu aprova, projetu Dekretu Governu ba alterasaun ne’e, hafoin halo análiza ba aprezentasaun husi Koordenadór Sala Situasaun, Sentru Integradu Jestaun Krize, kona-ba pontu situasaun epidemolójika nasionál.

Projetu Dekretu Governu ne’e mós define, sidadaun hotu-hotu iha Timor-Leste, iha obrigasaun atu evita formasaun halibur malu, iha dalan públiku, halibur malu ema barak iha grupu, ne’ebé liu ema na’in rua, ne’ebé menus husi metru rua entre sira.

Reuniaun Konsellu Ministru Estraordináriu ne’e prezide husi Vise Primeiru Ministru (VPM), no Ministru Planu no Ordenamentu Teritóriu, José Maria dos Reis.Tos