Ekipa Pilár VI-MS koloka ona iha Kasa-Nafar

Ekipa pilár VI husi Ministériu Saúde (MS) koloka ona sira-nia ekipa iha Aldeia Kasa-Nafar, Suku Dare, Postu Administrátivu Verra-Cruz, Munisípiu Díli, hodi  hala’o sira-nia atividade médiku ninian hanesan koko ema nia temperatura, wainhira hala’o pasa sasán ba malu iha liña fronteira.

Ekipa Saúde Pilár  VI koloka iha Kasa-Nafar iha  Sábadu (20/03/2021), relasiona  ho aplikasaun serka sanitária iha munisípiu Díli, ho objetivu atu koko ema nia temperatura uza mákina  thermo scanner, ne’ebé mak  pasa sasán nesesidade bázika ba malu  iha Kasa-Nafar, ne’ebé mak fronteira ho  Aldeia Consin, Postu Administrátivu Laulara, Munisípiu Aileu.

“Objetivu atu halo saída, sira mai atu halo advokásia, liu-liu material pesoál ka ema bolu alat pelindung diri, ema mai uza máskara ka lae? depois ema sira fase liman ka lae? depois ita haree sira-nia distánsiamentu sosiál iha ne’e, depois ita hahú ona uza thermo scanner, wainhira ita hetan ema manas ho temperature 39, 40 ba ona, ita presiza halo intervensaun direta. Ita hahú aban ba oin hetan ema mak temperatura 39 to’o 40, mak pilár VI servisu hamutuk ho pilár III,  ho PNTL  ita sei halo intervensaun direta ba ida ne’e. Wainhira  identifika, pilár VI kontaktu pilár III asegura ema ne’e, la’ós dehan ema ne’e ita hetan temperatura 36,  37  ita halo intervensaun lae. Se nia mai ita husu se nia moras ruma antes , molok  ita halo viajen mai iha ne’e, ida ne’e mak importante ita haree ba buat sira ne’e hotu”,esplika vokal point ba  pilár VI,  Evaristo Soares, ba GMN Sábadu (20/03/2021), iha Kasa-Nafar, Díli.

Tuir dadus ne’ebé mak GMN asesa husi ekipa pilár VI katak,  iha loron Sábadu  ne’e hahú iha tuku sanulu to’o tuku tolu lorokraik, sira  koko ema besik atus rua resin, uza mákina thermo scanner, maibé la detekta ema sira nia isin manas  ho temperatura a’as  husi grau 39 to’o 40, maioria 36,6  to’o 37,5.avi