JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kazu konfirmadu COVID-19 foun 23, rekuperadu na’in haat

Kazu konfirmadu COVID-19 foun  23, rekuperadu na’in haat

Koordenadór Forsa-Tarefa ba Prevensaun no Mitigasaun Surtu Covid-19, Rui Maria de Araújo, informa, Ekipa Konjunta Saúde Munisípiu Díli no Baucau detetan tan kazu konfirmadu Covid-19 foun hamutuk  23, hosi númeru ne’e 22 hosi Dili,  1 hosi Munisípiu Baucau, nune’e númeru atual baixa hamutuk 138, no rekuperadu 4.

“Dadus jerál, kazu foun ohin 23. Kazu rekuperadu 4. Kazu ativu: 138. Kazu na’in 23 ohin, iha mane na’in 8, feto na’in 15, idade entre tinan 10-14  ema 3, idade entre tinan 18-60 nian 20, sintomátiku 1, asintomátiku 22. Hosi horiseik mai ohin hamutuk hotu halo 543 exames laboratoriais,” Rui Araújo hato’o  informasaun liuhosi konferénsia ba  imprensa, iha Sala Situasaun Jestaun Krize CCD, Sesta (19-03-2021).

Rui esplika, evolusaun surtu covid-19 iha munisípiu Díli hosi kazu foun ne’ebé refere, na’in 22 iha Munisípiu Díli, ho detalles hanesan tuir mai, kazu pozitivu 3, kontaktu ho profisionál saúde hosi cluster Aldeia 05 ho cluster Aldeia São Miguel, Suku Comoro, ne’ebé servisu iha HNGV, unidade hemodiálize. Kazu pozitivu 5, kontaktu-besik ho profisionál saúde ida iha cluster Emergency Obstetrics and Neonatal Care (EMONC), Kazu pozitivu 7, kontaktu-besik ho Kazu konfirmadu ida iha BTN III, Aldeia Terra Santa, Suku Madohi, Postu Administrativu Dom Aleixo. Kazu pozitivu 6, kontaktu-besik ho kazu ida iha cluster Aldeia Maucocomate, Suco Becora, Posto Administrativo Cristo Rei. Kazu pizitivu 1, kontaktu-besik ho kazu konfirmadu ida iha cluster HNGV, hela iha Aldeia Auhun, Suku Becora, Posto Administrativu Cristo Rei. Ho nune’e, kazu detetadu ka pozitivu iha munisípiu Díli hosi dia 07 de Marsu 2021, to’o ohin 19 de Marsu de 2021, hamutuk hotu 117.

Lee hotu :   KomJer PNTL preokupadu ho moras animal kontinua mosu

“Kazu detetadu 117 iha Díli ne’e, fahe ba cluster 30, namkari iha instituisaun 4, eventu 1 no Suku 8, fatin kuarentena 1, iha Postu Administrativu Dom Aleixo, Vera Cruz ho Cristo Rei. Nune’e hakarak fó hatene mós ba públiku katak, unidade hemodiálize iha HNGV hahú funsiona hikas ona, hafoin paradu durante liu oras 24 nia laran. Servisu seluk iha HNGV la’o hanesan bai-bain”.

Rui relata, evolusaun surtu covid-19 iha munisípiu Baucau, ba loron horseik (sesta-Red) iha kazu foun 1. Hamutuk hotu Munisípiu Baucau deteta ona kazu konfirmadu na’in 8. Kazu foun ida ne’e, hela iha Aldeia Lamegua, Suku Bahu, Baucau Vila. Kazu konfirmadu ida ne’e halo viajen hosi Díli ba Baucau iha lorn 05 Marsu Marsu ne’e. Iha Díli nia hela iha Aldeia 25 de Abril, Suku Santa Cruz, Postu Administrativu Na’in Feto.

“Atividade prevensaun no mitigasaun covid-19 iha munsípiu sira seluk no  RAEOA, atividade prevensaun no mitigasaun Covid-19 iha Munisípiu sira seluk la’o hanesan bai-bain. Dadus ne’ebé iha, pur enkuantu hatudu katak, kazu hirak ne’ebé detetatu iha Baucau (na’in 8) no iha Viquque (na’in 3), kazu ne’ebé lori sai hosi Díli mak bá, entre 5 ho 9 de Marsu de 2021”, tenik Rui Araújo.

Iha biban ne’e Koordenadór Forsa-Tarefa ba Prevensaun no Mitigasaun Surtu Covid-19 haktuir, esplikasaun adisionál refere haree ba kazu ne’ebé aumenta ida iha Díli, no kazu ne’ebé deteta iha Baucau ho Viqueque, hotu-hotu kazu ne’ebé esporta hosi Díli, autoridade kompetente sira foti ona desizaun atu impoin medida adisionál, ho objetivu atu prevene hada’et-tutan moras ne’e hosi Díli ba munisípiu seluk.

Lee hotu :   Ekipa voluntáriu COVID-19 dezinfeta edifísiu GMN-TV

“Apela ba populasaun ne’ebé saí hosi Díli entre dia 5 to’o dia 9 madrugada, ba munisípiu sira seluk, molok serka sanitária hahú iha Díli, atu favor ida aprezenta-an ba autoridade saúde sira ne’ebé besik liu, imi nia hela fatin hodi bele hetan atendimentu. Apela mós ba komunidade iha munisípiu sira, wainhira hatene kona-ba ema ruma ne’ebé sai hosi Díli molok serka sanitária hahú iha Díli, halo favor informa hela autoridade sira atu bele halo atendimentu ba sira,” Rui Araújo apela.

Iha okaziaun ne’e Rui kontinua, apela ba populasaun Timor-Leste tomak, liu-liu iha munisípiu Díli, Baucau ho Viqueque, atu nafatin hakmatek, labele sé tilun ba lia-anin ka rumores, prátika nafatin medida sira ne’ebé hot-hotu hatene ona,  uza máskra,  fase liman bei-beik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, la presiza kaer liman, bensa-liman, rei-malu ka haku’ak malu,  evita halibur malu barak hamri’ik ka tur do’ok hosi ema seluk, mínimu metru ida ho balun.eni

Add to Comments Here!!!!

error: Content is protected.
Secured By miniOrange
You might also like:
PR: Labele aproveita COVID-19 halo kampaña eleitorál

Prezidente Repúblika (PR), Francisco Guterres Lú...

Estudante universitáriu triste ba prosesu aprendizajen online

Estudante, Mariano Moniz Cardoso,  hatete,prosesu aprendizajen...

FONGTIL: Públiku merese hatene progresu kona-bá osan Estadu

Diretór FONGTIL, Daniel dos Santos, hateten,...

Close