Odete Belo: Vasina AstraZeneca daruak ba ferik-katuas no moras króniku sira

Ministériu Saúde (MS) lansa ona vasina AstraZenaca faze daruak ho 20 mil doze ne’ebé mai husi Governu Austrália. Vasina AstraZenaca daruak ne’eba uluk diplomata, reprezentante Organizasaun Mundiál Saúde iha Timor-Leste inklui komunidade ne’ebé ho idade 60 ba leten no komunidade ho moras króniku sira.

“Lansamentu vasina segunda doze ba primeira faze ho 20 mil dozes ne’e,  sei foka uluk deit ba iha Díli, tanba episentru moras ne’e konsentra hotu iha Díli. Ho ida ne’e, esforsu tomak ne’ebé MS halo, oinsá atu reduz dadauk infeksaun iha sidade-laran,  saída maka ami haree ida ne’e, ema sira neebé ho moras tensaun, moras diabetes sira mós mai simu vasina, ita agradese no apresia tanba ita hotu konsiente katak, moras ne’e iha ita-nia rain, no ita persiza kuidadu ita ida-idak nia aan ho ita-nia família husi moras ida ne’e, tanba ne’e maka ita hotu nia hakarak”,hatete Ministra Saúde, Odete Maria Freitas Belo, iha nia diskursu bainhira abertura imunizasaun COVID-19 doze dahuluk ba segundu faze iha Sentru Saúde Comoro, Segunda (10-05-2021).

Odete esplika,  ho situasaun tranzmisaun komunitária,  ne’ebé akontese ona iha Díli,  ministériu deside katak,  ho kuantidade vasina AstraZeneca ne’ebé Governu Austrália apoia ne’e,  tenki vasina uluk,  ferik-katuas ne’ebé ho idade 60 ba leten,  inklui ho ema sira ne’ebé moris ho moras króniku sira, molok sira monu ba iha situasaun ne’ebé grave.

Iha fatin hanesan, Embaixadór Austrália iha Timor-Leste, Peter Roberts, hateten, sente haksolok bele mai lansa vasinasaun AstraZenaca faze daruak nian ba dozes rihun 20 ne’ebé espesifiku ba ema ho moras komorbidade no ema tinan 60 ba leten.

“ Ha’u fo parabens ba Timor-Leste nia servisu, ne’ebé susesu ona vasina faze dahuluk ba liña frente iha nasaun ne’e nia laran, Ministériu Saúde hetan dosazen husi Governu Austrália hodi asegura populasaun foku ba ema ho tinan 60 ba leten, ema ho moras komorbidade iha Díli”,dehan.

Nia informa, vasina  ne’e importante tebes, haree ba komunidade iha rai-laran. Tanba  ne’e, husu atu Ministériu Saúde presiza halo komunikasuaun barak ho komunidade liu-liu autoridade lokál sira hotu relasiona ho asuntu vasina ne’e rasik.

Nia dehan, Governu Austrália, sei kontinua apoiu servisu importante ida ne’e, hamutuk ho Ministériu Saúde ne’ebé halo parseiru ho Organizasaun Mundiál Saúde (OMS)  hamutuk ho UNICEF.

Nia dehan, vasina ne’e Governu Austrália produz hanesan mós vasina ne’ebé oferese ona ba ema millaun ida iha Austrália, tanba asegura ba vasina maka hanesan faze importante hodi sai husi pandeimia COVID-19 no sai ba situasaun normál ne’ebé antes ne’e Timor iha ba.

Ekipa saúde preparadu  atende ema ne’ebé simu vasina

Nune’e mos, iha loron hanesan, Vise Koordenadora Forsa Tarefa,  Prevensaun no Mitigasaun Surtu  COVID-19, Odete da Silva Viegas, hatete, ekipa saúde liu-liu,  médiku sira prepara hela  hodi atende ema sira ne’ebé simu ona vasina AstraZeneca,  maibé wainhira akontese trauma ka reasaun ruma.

“Karik akontese, ita-nia ekipa sira preparadu, médiku sira prepara aimoruk ne’ebé prepara ba chok anapilatik ne’e mos ita preparadu, aimoruk anapilatik ne’e wainhira ema ruma  ne’ebé karik hetan chok depois de vasina mediku sira tenki atende kedas ho aimoruk ida ne’e, para atu bele normaliza fali ema ne’e nia kondisaun”,Odete hato’o informasaun ne’e iha Sentru Saúde Comoro.

Odete infroma, MS nia tarjetu ba iha kazu komorbidade no ba ema  ne’ebé ho idade 60 ba leten, por volta 17.500 pesoas, husi númeru ne’e ema ne’ebé maka ho komorbidade por volta 9 mill, restu ne’e hirak ne’ebé mai ho idade 60 ba leten.

“Dadus ne’e husi Saúde na Família ne’ebé lansa hahú 2015, nune’e se dadus hirak ne’e balun seidauk tama, MS hamutuk ho ekipa sei nafatin buka tuir, ba hirak ne’ebé mate ona ekipa sei ajusta hela dadus ne’e rasik”, tenik.

Enkuantu Odete, infroma, iha loron 19 ne’e, vasina AstraZeneca hamutuk 10 mill dozes ne’ebé sei mai tama Timor, ne’ebé nafatin hetan apoiu husi Governu Austrália.

“ Iha 20 mill dozes ne’e, ita hahú iha Díli, depois iha semana ida ne’e nia laran ita mós bele espanda tan ba iha munisípiu sira ne’ebé maka risku ba COVID-19 aas, inklui  iha munisípiu sira ne’ebé maka iha fronteira hanesan Suai, Maliana no Oekusi”,dehan.

Tanba ne’e nia husu, kontribuisaun no konsiénsia husi populasaun tomak atu bele mai hakbesik-an iha fasilidade saúde hotu, nune’e ekipa saúde mós sei esforsu atu la’o tuir suku hirak ne’ebé kazu aas, atu nunee, ba hirak ne’ebé ho idade aas liu, moras no labele ona la’o, MS liu husi ekipa bele ona oferese.

 “Fiar, desizaun vasina ne’e seguru no efikasia, tanba ne’e husu ba ema sira ne’ebé elizivel bele mai lalais hodi simu vasina  ne’e rasik”,subliña.eni

Leave a Reply

Your email address will not be published. Required fields are marked *