ORJ lamenta pesoál saúde HNGV abandona pasiente to’o mate

Organizasaun Rezisténsia Juvenil (ORJ) hamutuk ho família sira, lamenta ho sistema atendimentu husi pesoál saúde balu iha sala emerjénsia, Hospitál Nasionál Guido Valadares (HNGV), hasoru saudozu Sérgio Fontoura Guterres Freitas alias Gamuloi-Hammer ne’ebé nu’udar pasiente permanente, fase-ran, maibé konsidera fali nu’udar pasiente COVID-19, no abandona to’o hakotu iis (mate).

Organizasaun Rezisténsia Juvenil ho família matebian, hato’o sira-nia lamentasaun ne’e, liu hosi konferénsia ba imprensa iha matebian nia rezidénsia, Comoro, Sábadu (08/5/2021).

Matebian Sérgio Fontoura Guterres Freitas alias Gamuloi-Hammer, hanesan pasiente permanente fase-ran iha Hospital Nasionál Guido Valadares, wainhira família sira, lori ba Sala emerjénsia, la’os tur iha kadeira roda mak dudu, no la’os hatoba maka hulan ba, maibé pasiente la’o mesak deit, no família sira akompaiña deit.

Objetivu família sira lori matebian ba sala emerjénsia ne’e, atu hetan atendimentu lalais, ba matebian nia asma ne’ebé sa’e fila fali, hodi nune’e bele kontinua fase-ran, maibé ho sistema atendimentu pesoál saúde sira balun iha sala emerjénsia HNGV ne’ebé atraza, lori saudozu Gamuloi Hammer hakotu iis.

Ho ida ne’e, Organizasaun rezisténsia Juvenil konsidera pesoál saúde, ne’ebé hala’o knar iha sala emerjénsia, iha loron ne’e, la halo atendimentu lalais, wainhira família sira, lori saudozu Gamuloi ba iha sala emerjénsia ne’e, ne’ebé ikus mai saudozu hakotu iis.

Saudozu Sérgio Fontoura Guterres Freitas alias Gamuloi-Hammer nia espoza kous hela ho sira-nia oan

Porta Voz Organizasaun rezisténsia Juvenil, José Manuel Nakfilak deklara, kazu sira ne’e la’os foin akontese ba dala uluk, maibé akontese fila-fila ona. No ba kazu saudozu Gamuloi nian ne’e, Ministériu Saúde presiza halo investigasaun, ba pesoál saúde sira ne’ebé hala’o knar iha sala emerjénsia, iha momentu ne’ebá, hodi halo atendimentu ba pasiente Gamuloi, tanba bele konsidera, iha tendénsia atu kontribui ba pasiente hodi hakotu iis.

“ Prátika ne’e, ita bele halo analiza to’o iha ne’ebá. Katak iha tendénsia. Maibé atu aprezenta loloos, prátika ne’e iha duni tendénsia, tenke iha faktus ne’ebé iha liu hosi investigasaun. Ivestigasaun ne’e sé mak bele halo. Ministériu saúde di’ak liu hadia nia jestaun, iha asisténsia iha sala emerjénsia. Sé Ministériu saúde liu hosi Ministra Saúde, iha tilun para rona, família no organizasaun rezisténsia nia lamentasaun, nia bele hahú prosesu investigasaun ba iha sala emerjénsia, ba sira ne’ebé iha momentu ne’ebá, simu pasiente ne’e, ba iha sala emerjénsia. Ho evidénsia ne’ebé mak matebian nia kaben rasik hato’o”, hateten José Manuel Nakfilak.

Tanba José Manuel haktuir, matebian Gamuloi sai hosi ba Hospitál, la’os kous mak tau iha kareta, maibé la’o deit mak sa’e kareta. Tun iha hospital mós la’o mesak mak tama ba sala emerjénsia, la’os ho maka mak ba foti.

“Depois de kuarenta minutus, husik abandona hela mak, nia forsa ne’e komesa diminui, to’o nia mate iha sala emerjénsia ne’e, presiza halo investigasaun. Liu hosi investigasaun ne’ebé mak Ministra Saúde bele halo mak bele hatudu faktus loloos katak, iha tendénsia duni ga lae, husi ajente sira ne’ebé hala’o knar iha sala emerjénsia, hodi halo atendimentu ba ema sira ne’ebé mak presiza tebes atendimentu urjente iha momentu ne’ebé, sira presiza duni”, Primeiru Vise Komite Ezekutivu Noventa ne’e esplika.

Nune’e mós membru organizasaun rezisténsia juvenile, atuál deputadu iha Parlamentu Davíd Dias Mandati hateten, organizasaun rezisténsia no família sira, la’os akuza dotor sira, maibé hakarak husu ba Ministériu kompetente, atu hadia jestaun servisu hospital nian, nune’e labele repete tan situasaun hanesan iha futuru, hodi nune’e labele halakon povu nia konfiansa.

“La’os ami tenta atu akuza ema ruma. Ami nia intensaun la’os tenta akuza. Porque ne’e la’os kazuistiku deit. Bebeik ona akontese ba ami nia ema barak. Ami la akuza dotor sira, maibé ami husu ba Ministériu Kompetente atu hadia jestaun. Para bele iha atensaun di’ak liu. Ami sira ne’e, barak mós ami moras, ami ba to’o liur, ema nia forma de atendimentu ne’e diferente ho ita iha timor ne’e. Ami la’os akuza maibé ami sei diskuti, hodi husu ba ministériu kompetente, atu hadia jestaun, para situasaun hanesan labele reteira. Sé la’e detoririza ema nia fiar ba ita nia saúde. Kuandu detoririza ona maka sai problema boot. Maibé ami la’os grupu ida ne’ebé hakarak detoririza konfiansa sosiedade nian ba ita saúde. Maibé ami tenta suporta maibé ami hein katak atendimentu tenke di’ak liu tan fali”, hateten David Dias Ximenes.

Organizasaun rezisténsia Juvenil husu ba Governu no Estadu, atu tau matan mós ba Juventudi sira nian saúde, tanba sira mós kontribui ba luta libertasaun nasionál Timor Leste. Tanba ukun-an ne’e, esforsu husi frente sira hanesan, Frente armada, klandestina no frente diplomátika, maibé iha mós frente ida ne’ebé importante mós mak frente urbana, iha ne’ebé joventudi tomak envolve. Iha ne’ebé wainhira joven sira envolve iha manifestasaun ruma, militar Indonézia sira buka tuir, ba sira nia uma ne’ebé sira hatene, hiit dadaun joven sira ne’e ba hodi kroinada no tortura to’o balun lakon nia vida.

Saudozu Sérgio Fontoura alias Gamuloi-Hammer nu’udar pasiente fase ran, kuaze tinan haat ona ne’e, hakotu iis,  iha Sesta (7/5) tuku 05:00 madruag, halot iha Sábadu (8/7) iha semitériu Públiku Becussi, ne’ebé asiste hosi nia família, kolega, amigu, kompaneiru da luta, no mós F-FDTL, hodi presta omenajen o tiru sa’e kilat, hodi konsidera saudozu Gamuloi-Hammer nu’udar heroi da patria.GMN

Leave a Reply

Your email address will not be published. Required fields are marked *