Posu sentina iha izolamentu Vera Cruz nakfera

Posu Sentina iha Izolamentu Vera Cruz, nakfera, foer sai hotu ba iha estrada-laran, nune’e foer dois fó impaktu ba iha pasiente baixa iha sala izolamentu laran, inklui mós seguransa iha liur .

Tuir pesoál balun ne’ebé  iha sala  izolamentu ne’ebé lakohi temi naran, hateten posu Sintina refere nakfera loron rua ona, maibé too agora nein ema ida mak mai hare no hamoos.

“Ami koa’lia ema la fiar no la rona, maibé ami sira seguransa iha laran, lao ba mai la tahan, tanba dois, posu la’dois de’it iha oin mai, maibé tama too iha izolamentu laran, ita hatene pasiente ne’ebé baixa iha izolamentu Veracruz ne’e, pasiente balun ho kondisaun grave, pasiente balun mai ho oan bebé, kuandu posu nakfera hanesan ne’e fó mós impaktu ba ema nia saúde”,Informa pesoál seguransa ne’e ba jornalista sira iha izolamentu Vera Cruz, Domingo (16/05).

Nia konta, posu nakonu, tanba pasiente baixa iha izolamentu ne’e mós barak, lor-loron pasiente sira fase roupa uza be foer fakar  ba iha posu laran, nune’e kauza ba posu nakonu lalais.

“Ita hamrik de’it iha portaun oin mós la tahan, tanba iha semente leten ne’ebé be foer nakonu lori hotu foer sira sai hotu iha liur, ita bele dehan, ita halo movimentu ba mai iha de’it sentina nia leten”,dehan.

Iha sorin seluk, Pesoál Seguransa PNTL, ne’ebé fó seguransa iha izolamentu, preokupa, ho posu nia dois.

“Ami seguransa nia fatin mak tuur iha portaun oin, maibé ami tenke muda ses metru 20, dook husi portaun, tanba ita tuur iha ne’ebé anin baku dois mai tomak”,preokupa.

Nia dehan, posu iha izolamentu sira, tuir loloos ekipa ne’ebé responsabilidade ba iha izolamentu tenke hare buat sira ne’e,  tanba dois ne’e mós prejudika ba ema nia saúde.

“Ita hatene Kaikoli ita hela iha bee-leten, agora ita-nia pasiente sira iha laran mós uza bee hanesan uza iha uma, roupa tenke fase hela de’it, tanba pasiente balun mai ho oan bebé, sira presiza bee”,subliña.

Koordenadór Forsa Tarefa Prevensaun no Mitigasaun Surtu COVID-19, Rui Maria de Araújo, hatete, kona ba problema refere, lojístaikamente sei haree no tau atensaun hodi hadia. eni

Leave a Reply

Your email address will not be published. Required fields are marked *