TL rejista tan kazu óbitu COVID-19 na’in rua

Nasaun Timor Leste (TL), iha Domingu (16/05/2021), rejista tan  kazu óbitu COVID-19 na’in  2, husi na’in rua ne’e ida sidadaun Xinéz. Sidadaun Xinez ne’e mate tanba COVID-19, no sidadaun Timor-oan ne’e mate ho COVID-19, nune’e ema ne’ebé mate ba COVID-19 hamutuk ona na’in 10.

“Totál kazu óbitu ne’ebé relata, 16 de Maiu 2021 iha na’in 2, ho detalle hanesan tuir mai, Mane idade 56, hela iha Santa-Cruz, horiseik dia 15 de Maiu, maiz ou menus 11h00 dader, iis-kotu iha servisu fatin iha Fatuhada. Kolega servisu sira informa ekipa vijilánsia epidemiolójika, no ho autorizasaun família nian halo swab post portemiha 11h31. Rezultadu hatudu pozitivu ho Cycle Threshold (CT) N gene 33,4, E gene 31,2. Família deside atu lori ba hakoi iha Lospalos, tuir protokolu funerál ba ema ne’ebé mate ho COVID-19. Tuir informasaun husi família, mate-bian iha istória tensaun-a’as, no la kontrola regularmente”,dehan Porta-voz Sentru Integradu Jestaun Krizi (SIJK), Rui Maria de Araújo ba jornalista sira.

Iha biban ne’e Rui informa, sidadaun Xinés, mane, idade 58, hela iha Comoro, ba HNGV iha dia 11 Maiu, ho isin-manas maka’as, hafoin diagnostikadu sindroma insufisiénsia respiratória aguda (SIRA), ka difísil atu dada-iis no deteta SARS-CoV2 ho Cycle Threshold (CT) Ngene 27,1, Egene 24,9. Hahú kedas kalan ne’e, halo tratamentu iha fatin izolamentu Vera Cruz, no horiseik lorokraik iis-kotu, tranba fallansu respiratóriu (respiratoric failure) ho multiple organ failure.

Família ho Embaxada Xina koordena hela ho ekipa CIGC-SS atu halo kremasaun.

“Ita laiha fatin ba krimatorio ba ema ne’ebé mate ho covid-19, maibe ita sei koordena ho Embaxada oinsa atu hare ba problema refere”,informa Rui.

Tuir Koordenadór Pillar I, Narciso Fernandes, hateten, mate óbitu na’in hirak ne’ebé durante mate ho COVID-19, katak tuir konkordansia husi Sala Situasaun Jestaun Krize, halo negosiasaun ho familía sira, hanesan baibain mate-isin sai husi izolamentu Vera Cruz sei ba iha matebian nia rezidensia rai ho minutu 30 hafoin lori liu sai ba halót tantu ida Díli no Munisípiu sira.

“Mate-isin ne’ebé sai husi familía nia rezidensia atu lori sai ba iha Munisípiu mós nafatin tuir protokolu, to’o iha uma sei nafatin rai minutu 30 hafoin lori sai ba halót iha semitériu”,tenik.

Mate-bian husi Munisípiu Lautem,  suku Maina II, Postu Administrativu Lospalos Munisípiu Lautem, mate-bian mate husik hela fen-kaben ho oan na’in-rua.

Dadus ne’ebé GMN asesa liu husi SIJK hatudu katak, kazu detetatu foun ne’ebé relata iha loron  (16-05-2021) hamutuk  179 iha Díli 156, iha Munisípiu seluk 23. Husi totál kazu detetadu foun ne’e,  mane 98, feto 81. Totál kazu konfirmadu kumulativu hahú husi (21-05-2021) to’o (16-05-2021) 4458, kazu ativu 2116, kazu rekuperadu 65. eni

Leave a Reply

Your email address will not be published. Required fields are marked *