Oitavu Governu liu husi Munisípiu Díli, sei hadia hotu jardin sira iha Díli laran, tanba sidade Díli sai hanesan kapital nasaun.
Vise Ministru ESTATAL, Abilio Caetano hateten, Governu presija hadia jardim sira iha kapital Díli, atu haree furak iha ema nia matan.
“Presiza hadia jardin sira hodi hamos, nune’e ambiente iha sidade Díli ita haree moos, hodi atrai ema seluk ne’ebé mai vizita ita-nia rai”, hateten Abilio Caetano ba GMN iha edifísiu Munisípiu Dili, Sesta (04/01).
Alende ne’e Vice-Ministru ESTATAL ne’e mós husu sidadun sira ne’ebé hela iha sidade Díli bainhira halimar iha jardin laran, tenki kuidadu ambiente iha fatin refere.
“Labele hein de’it mak pesoal saneamentu sira, maibé sidadaun hotu tenki kontribui”, katak Abilio.
Tuir Abilio Caetano, jardin atu moos, presiza sidadun hotu nia kontribuisaun, tanba dala barak sidadaun sira ba halimar iha jardin laran, soe foer arbiru de’it no estraga aifunan sira iha jardim laran.
“Bainhira jardin laran ne’e moos, sidade Díli ema haree furak tebes, tanba ne’e presiza sidadun hotu nia kontribuisaun hodi kuidadu jardin sira ne’e”, katak Vise-Ministru ESTATAL ne’e.
Entretantu to’o agora jardin sira ne’e kuaje laiha mantensaun husi Governu, tanba jardin barak mak duut naruk lemo-lemo, no foer mós namkari iha jardin laran.aba
