Guarda kontratadu Hospital Nacional Guido Valadares (HNGV), ameasa sei halo greve hasoru Konsellu Diretiva Hospital Nasional Guido Valadares, tanba halo diskriminasaun saláriu entre guarda no cleaner.
Supervisor Guarda HNGV, Gaspar Je da Costa, informa, nia ho nia membru nain 680 ne’ebé sei ativu, sei halo greve tanba saláriu la aumenta, maske servisu ona iha HNGV kuaje tinan 10 resin, maibe saláriu nafatin ho montante dolar americanu US$130
“Ami nia preokupasaun mak ne’e, ami servisu iha ne’e iha tempu krizi 2006 to’o agora, maibé ami nia kargu Xefia sira la konsidera ami, ohin ami mai iha ne’e atu asina kontratu ho hanoin katak, ami nia osan aumenta, maibé na realidade ami nian mak mate nafatin US$ 130, saláriu ida ne’e mak ami hetan desde inísiu tama to’o agora, no kontratu ami simu kada tinan ida maibé agora sira hatun fali fulan 6, ida ne’e mak ami la simu. Tanba saida mak ami tenki ho saláriu ida ne’e nafatin”, Gaspa Je da Costa hato’o lamentasaun ne’e ba GMN, hafoin enkontru ho Xefi Rekursus humanus, HNGV, Valentin Soares iha HNGV, Segunda (7/1/2019).
Gaspar mós ameasa sei hato’o asuntu ne’e ba Parlamentu Nasional, bainhira laiha rezultadu pozitivu husi konsellu diretivu sira.
“Agora mai hein tanba ohin sira dehan, aban (ohin), sira sei enkontru ho ami,no bainhira enkontru ho sira ne’e mak laiha rezultadu, mak ami mós sei ba iha Parlamentu Nasional tanba sira mak povu nia reprezentante”, relata Gaspar.
Nia dehan, sira sei la asina kontratu, bainhira laiha mudansa ba saláriu, tanba guarda hirak ne’e servisu iha HNGV iha tempu krize nia laran.
“Ami sei la asina kontratu, tanba ami servisu iha ne’e la’os iha situasaun ida di’ak hanesan agora, ami servisu iha ne’e iha tempu ida ne’ebé mak krize nia laran, momentu ne’e seguransa sira tauk halai hotu mak bolu ami mai. Antes ne’e ami nu’udar seguransa kompañia, maibé tanba dehan ulun moras, entaun sira kontratu ami nemak to’o agora ho salário US$130, cleaner nian aumenta maibé ami nian mak nafatin”, lamenta Gaspar.
Hatan ba preokupsaun ne’e, Xefi Rekursu Umanu Planeamentu no Estatístika Hospital Nasional Guido Vakadares, Valentim Soares, hateten, nu’udar entidades ne’ebé mak serivisu iha parte tékniku, labele halo buat ida tanba desizaun hotu mai husi lider másimu Institusaun refere nian.
“Tuir planu diresaun ida ne’e atu estende tan sira nia kontratu ba tinan ida ne’e nian, entaun ohin iha oportiunidade ida ne’e, rekursus humanus ho gabineti tenta konvoka reuniaun ho sira hodi esplika kondisaun sira nian, inklui mós termus ba sira nia kontratu, ami fó hatene ba sira atu bele prepara hodi asina kontratu, bazeia ba sira nia saláriu anterior nian, maibé tanba sira deskontenti ho salário ne’e, entaun sira la konsege asina, no ita sei termina tempu seluk, no aban sira sei enkontru ho Diretor ezekutivu, pois ita hein desizaun, tanba ami nu’udar tékniku ami depende ba desizaun”, katak Valentin.
Tuir Planu seguransa ho total nain 680 ne’e, sei halo enkontro direita ho Diretor Ezekutivu Hospital Nasional Guido Valadares iha loron 8/01, hodi buka solusaun.Ola
