Maske Governu liu husi Munisípiu Díli, durante ne’e aluga kareta 40 hodi foti lixu iha kapital Díli, maibé loron ba loron volume lixu aumenta ba bei-beik.
Komunidade Hilário Rosa Ximenes hateten, maioria komunidade iha kapital Díli preokupa ho lixu, tanba kuaze naklekar to’o estrada públiku.
“Ami ne’ebé hela besik fatin lixu, preokupa tebes tanba volume lixu iha Aimutin Aumenta maka’as, alende ne’e iha mós fatin estrada públiku hanesan merkadu Comoro, Fomentu, Tasitolu, Caicoli, Vila-verde no Bebora Aumenta ba bei-beik iha fatin públiku tama to’o estrada, hodi fó afeta ema nia saúde, liu-liu labarik ki’ik sira, tanba komunidade hela iha fatin seluk, mós mai soe lixu iha fatin seluk, nune’e foer aumenta tanba pesoal saneamentu sira mós seidauk foti, nune’e lixu loron ba loron aumenta ba bei-beik”, hateten Hilário Rosa Ximenes ba GMN iha Aimutin Dili, Sesta (04/01)
Nia hatutan, lixu aumenta tanba populasaun barak iha kapital Díli laiha konsensia, populasaun barak mak mai buka moris, maibé laiha domin ba sira nia rai rasik.
Nune’e mós komunidade Moises Rodrigues Sarmento hateten, durante semana ida resin ona pesoal saneamentu la foti lixu iha kapital Díli, hodi halo Díli laran nakfilak ba sidade lixu.
“Husu ba autoridade Munisípiu Díli atu kontiua foti lixu, nune’e labele afeta ba ema nia saúde, liu-liu labarik ki’ik sira tanba volume lixu ne’e aumenta maka’as hodi taka tiha halo ema la’o iha estrada ne’e taka inus mak la’o ba mai”, lamenta Moises.
Tanba ne’e nia husu ba Munisípiu Díli liu-liu pesoal saneamentu presiza fó atensaun ba lixu nune’e evita foer iha kapital Díli hanesan agora dadauk ne’e.
Hatan ba preokupasaun ne’e, Vice-Ministru ESTATAL, Abilio Caetano hateten, Munisípiu Díli sei halo esforsu tomak atu raut lixu iha kapital Díli, nune’e iha semana ida ka rua tan volume lixu bele menus ona.
“Governo sei implementa lei númeru 2/2004, ne’ebé hateten, ema ne’ebé soe foer liu oras, tenki multa, nune’e ema hotu bele tuir regas no kareta ne’ebé Governo aluga hodi raut foer iha sidade Díli, hamutuk kameoneta 40, maibé lasubfisiente, nune’e Munisípiu Díli sei buka tan kareta kameoneta 10 hodi aumenta para bele perkora foti lixu iha fatin hot-hotu”, katak Abilio Caetano.aba
