Sosiedade Sivíl konsidera, VIII Governu gasta osan bo’ot ba Expo Dubai, hanesan abandona povu. Tanba, governu laiha seriedade atu hadi’a povu nia moris liu hosi investe osan ba setór produtivu, hanesan edukasaun, saúde no agrikultura.
“Osan millaun $2,119,000 ba expo Dubai, la fó benefísiu ba povu nia moris,” hatete Diretór Ezekutivu FONGTIL, Daniel dos Santos Carmo, ba JN-Diário, Kuarta (15/01/2020) iha Kaikoli Díli.
Tuir Daniel, orsamentu ba Expo Dubai hanesan orsamentu ho karakter gasta de’it, tanba la lori benefisiu ba povu. Nia dehan, iha Expo Dubai Timor-Leste sei la lori buat ida atu promove ba mundu internasionál.
“Sera que atu lori de’it dansa kulturál mak ba iha ne’eba? Ita lamenta kuandu diplomata sira hatete Expo Dubai hanesan investimentu. Antes ne’e, ita partisipa ona Expo Sanghai. Maibé, to’o agora lori benefisiu saida mai ita? Expo Shanghai nia rezultadu mak lori eis Sekretáriu Estadu Arte Kultura ba hatán iha Tribunál,” Carmo esplika.
Timor-Leste, nasaun frajil. Tanba ne’e, nia sujere sei iha rekursu uitoan di’ak liu aloka ba setór produtivu, hodi sustenta mákina estadu no dezenvolvimentu rai-laran.
“Nusa governu la uza osan ne’e atu harii sala de aula ba estudante sira, konstrui postu saúde no kontinua haree programa zero plástiku ka oinsá minimiza lixu iha kapitál Díli, doque gasta ba expo ne’ebé laiha benefisiu,” Carmo hatete. Fel
