Prezidenti Repúblika Francisco Guterres Lu Olo, hatete atu rekoñese no valoriza heroi sira nia luta, entidade sira ne’ebé hakerek istória timor leste, tenki hakerek ho rigór no responsabilidade, hodi bele transmite istória loloos ba jerasaun foun sira.
Xefe Estadu hato’o lia hirak nee iha komemorasaun Loron Nasional Herois, Tersa (31/12) iha Routunda Prezidente Nicolau Lobato, Comor Díli.
“Ita nia heroi no eroina sira hanesan sidadaun sira ho sentidu responsabilidade boot , sira hasoru terus oin-oinn no fakar sira nia ran hodi ita hetan ukun rasik aan, heroina Maria Goreti dehan katak hau nia isin laos hau nian oan, maibe hau nia klamar sei sai hau nia rohan laek, wainhira Nicolau Lobato mate iha kombate iha loron 31 fulan Dezembru 1978, ita konsege organiza resistensia no garante unidade entre lideransa no povu sira, hodi restrutura baze sira tanba sentidu patriotiku kuda ona iha ida idak nia fuan no laran”, dehan Xefi Estadu.
Prezidente Republika akresenta, nudar Estadu ida livre, independente no demokratiku, iha obrigasaun hodi partisipa no kontribui ba dezenvolvimentu nasional ho tenasidade ho reponsabilidade, ho matenek no persistensia tuir heroi no heroina sira nia hanorin.
“Ita mos iha obrigasaun hodi transimite ba jerasaun foun ita nia istotia lolos, ne’ebe ita hotu urgullu no lori ita to’o ukun rasik-an, hau husu ba ita hotu, governu, Konsellu Kombatentes Libertasaun Nasional , ne’ebe halibur kombatente sira hotu, muzeu rezistensia, sentru nasional chega, Komite Orientador 25, no sira seluk tan, servisu hamutuk hodi hakerek ita nia istoria luta libertasaun nasional ho rigor no responsabilidade”, akresenta Lu-Olo.
Lider maximu Timor – Leste nian nee fundamenta liu tan, eransa importante ne’ebe rekonese no valoriza duni heroi no heroina sira, no kombatente sira hotu, nune’e bele iha konfiansa katak, nia nasaun sei buras ba bebeik.Oly
