Komando Rejiaun II Bivaque Kaixa Inglaterra la konkorda ho desizaun Ministru Ensinu Superior Siénsia no Kultura (MESSK), Longuinhos dos Santos, ne’ebé limita númeru estudante foun iha rejime espesiál. Tanba tuir sira desizaun Ministru taka dalan ba veteranu nia oan sira atu asesu ba Universidade Nasionál Timor Lorosa’e (UNTL).
“Bazea ba prosesu simu estudante foun ba anu letivu tinan 2020 hosi UNTL, ne’ebé MESSK limite veteranus nia oan hodi simu deit estudante ba rejime espesiál hamutuk 312”, haklean Kordenador Komando Regiaun II Bivaque Kaixa Inglaterra, Norberto Esperito Santo “Rolax-Uatumau”, liu hosi konferensia imprensa (14/01/2020) iha Komoro-Díli.
Nia hatutan, planu Ministériu ne’e tuir prosesu luta nian kontra ona prosesu luta ba libertasaun nasionál, tanba durante iha okupasaun Indonézia to’o rezistensia ona izola total ho razaun FRETILIN nia oan no laiha oportunidade ba eskola hahú hosi primária to’o Universidade durante tinan 24 rezistensia nian.
Nune’e mai fali iha segundu 20 anos hahú husi tinan 1999, laiha nafatin oportunidade simu balun deit hanesan estratéjia polítika edukasaun Timor-leste nian, ne’ebé hatete katak veteranus nia ona tenke ba eskola ho bolsa estudu Estadu nian maibé pelo kontrariu oportunista nia oan mak hetan bolsa estudu eskola iha Timor inklui estranjeiru maibé veteranu nia oan laiha, afirma Norberto Esperito Santo.
Rolax-Uatumau realsa, tanba ne’e KRIIBKI kondena makas desizaun Ministru nian no husu atu labele limite veteranu nia oan asesu rejime espesiál hodi eskola iha UNTL tanba veteranus nia luta mak hari’i Nasaun no demokrasia.
“Ami husu ba Primeiru Ministru, Taur Matan Ruak, nu’udar veteranu ida hodi tau atensaun nune’e mos fo despaisu ida ba Ministru Longuinhos, hodi la aplika nia hakarak ne’ebé hatudu hanesan ema pro-autonomia no integrasista ida nia prátika ba iha prosesu simu esudante UNTL period 2020”.
Antes ne’e, Ministru Ensinu Superior Siénsia no Kultura (MESSK) Longuinhos dos Santos hatete, tinan ne’e Ministériu ensinu superior hamutuk ho UNTL no Institutu Politekniku Betanu (IPB) sei simu estudante foun ba UNTL no IPB hamutuk 3.895 hosi rejime jeral oportunidade inklui rejime espesial, tanba haré ba espasu universidade inklui atu garante kualidade ba estudante sira.Fel
