Sentru Lojístika Nasionál (CLN_sigla Portugés) entrega fós saka rihun hat nulu (40.000) ba Ministériu Solidaridade Sosial no Inkluzasaun (MSSI), hodi antesipa bainhira akontese dezastre naturais iha rai laran .
Tuir planu, fós refere sei distribui ba Munisípiu 12, inklui Rejiaun Administrativu Epesial Oe-cusse Ambeno (RAEOA), hodi tau iha ida-idak nia armazen, nune’e bainhira akontese dezastre naturais, foos refere bele responde populasaun sira ne’ebé afetadu.
“Seremónia lansamentu ida ohin atu fó apoiu ba Ministériu Solidariedade Sosial no Inkluzaun, ne’ebé antes ne’e hatama ona pedidu ba CLN atu husu apoiu fós hamutuk saka 40.000, atu distribui ba Munisípiu sira hotu, hodi antisipa bainhira populasaun iha Munisípiu sira hetan dezastre naturais, nune’e bele responde lalais. Ne’eduni distribuisaun fós ne’e”, hateten Prezidente CLN, Augusto Junior Trindade ba Jornalista iha Armazen Tibar, Segunda (18/02).
Agusto haktuir, fós hirak ne’e Governu Timor- Leste, liu husi Ministériu Komérsiu Indústria, Diresaun Sentru Lojistika Nasionál, sosa husi Vietnam iha Tinan 2017.
Tuir Agusto, iha tempu badak CLN sei servisu hamutuk ho Ministeriu Agrikultura no Peskas ho Sekretariu Estadu Kooperativa atu tu’un ba Munisípiu sira hanesan Maliana, Covalima, Viqueque no Manatuto hodi halo sensibilizasaun ba komunidade sira, nune’e Governu bele sosa sira nia hare hodi dulas.
Nune’e mós Ministra Solidariedade Sosiál no Inkluzaun Armanda Berta, agradese ba apoiu sentru lojístika nasionál ne’ebé kumpri ona ninia pedidu hodi intrega fós hirak ne’e.aba
