Vendedores sira preokupa ho lixu ne’ebé namkari iha merkadu Taibesi, tanba durante loron tolu ona Diresaun Saneamento seidauk ra’ut.
Relasiona ho lixu ne’ebe namkari iha merkadu Taibesi, vendedor sira ne’ebé fa’an merkadu refere ezije ba Munisípiu Díli, Diresaun Saneamentu atu foti lixu iha merkadu Taibesi, tanba volume lixu aumenta.
“Ami Ejize ba Munisípiu Díli, li-liu diresaun Saneamentu atu mai foti lixu, tanba lixu ne’e naklekar iha fatin-fatin iha merkadu, hodi halo kondisaun iha merkadu la hijiene, koprador sira mós la mai sosa sasan, tanba lixu dois ona. Ne’eduni husu ba Munisípiu Díli atu tau konsiderasaun, hodi resolve”, hateten Romana Sarmento ba GMN iha Merkadu Taibesi Díli, Sabadu (09/02).
Nia haktuir, mesmu parte saneamentu haree hela lixu aumenta iha merkadu, maibé dala barak loron ida saneamentu tula dala rua de’it.
Tanba ne’e, vendedor sira iha merkadu Taibesi ne’e, husu ba Munisípiu Díli atu aumenta kareta, para bele rezolve preokupasaun ne’e, nune’e ema gosta ba sosa vendodor sira nia sasan iha merkadu refere.
Nune’e mós, vendedor Guilermino da Conceição, hateten, lolos ne’e fatin hanesan merkadu presija moos no saudavel, tanba fatin ne’e atu halo negosiu hodi fila liman, nune’e komprador sira gosta ba sosa iha fatin sasan, tanba kondisaun moos no saudavel.
Tanba ne’e, nia kontinua Ezije ba Munisípiu Díli, li-liu Diresaun Saneamentu atu resolve problema ne’e, tanba durante semana ida ona sira la ra’ut lixu iha merkadu ne’e.
Tuir Observasaun Jornalista GMN iha kapital Díli nota katak, alende lixu iha merkadu Taibesi, iha mós fatin públiku hanesan iha area Audian, Santa Cruz, Becora, Hudilaran no Bebonuk.aba
