Prezidente komisaun organizadora selebrasaun loron veteranu, Virgílio Smith, hateten, selebrasaun iha tinan ida ne’e sei hasa’e bandeira tolu, hanesan Frente Revolucionária de Timor-Leste Independente (FRETILIN), Forças Armadas da Libertação Nacional de Timor-Leste (FALINTIL) no Conselho Nacional da Resistência Timorense (CNRT).
“Ami mai husu lori programa hodi hato’o ba Prezidente Parlamentu Nasionál (PN) Arão Noe no nia disponibilidade hodi prezide serimónia hatun bandeira iha parte lokraik no briefing ba programa tomak, hodi bele intera loloos ajenda ne’ebé sei realiza iha loron nasionál veteranus ne’ebé monu iha loron 3, fulan Marsu, tinan ne’e”, Prezidente komisaun organizadora ne’e ba jornalista sira iha PN, Sesta (28-02-2020).
Nia esplika, iha serimónia ne’e líder nasionál sei fahe esperensia kona-bá tempu rezistensia nini’an, nune’e jerasaun foun no sosiedade ne’ebé partisipa bele intende kona-bá istória Timor-Leste ni’an.
“Ita espera iha semináriu ne’e, ita nia líder nasionál sira sei fahe esperensia funu no rezistensia ni’an, memoria hahú husi tinan 1974 to’o 1999, durante funu naruk ba prosesu ukun rasik-an, iha loron 3, fulan Marsu ne’e, sei iha serimónia isar bandeira iha parte rua, parte dahuluk sei hasa’e bandeira tolu hanesan FRETILIN, FALINTIL no bandeira CNRT ne’ebé hakotu ita-nia funu ba ukun-an, ho hanoin ida, momentu ida, marka pasu foun ida ba selebrasaun loron nasionál veteranus marka ho hafoin hala’o primeiru kongresu, hodi estabelese Konsellu Kombatente Libertasaun Nasional”, tenik Virgílio.
Entretantu programa ne’ebé sei realiza iha loron nasionál veteranus ne’ebé monu iha loron 3, fulan Marsu ne’e, hanesan iha loron 1, dader tuku 09:00 sei hala’o misa iha Jardim dos Heróis Metinaru no loron 2, sei realiza semináriu no iha loron 3, fulan Marsu ne’e, sei hala’o isar bandeira. ety
