Atu komemora loron Veteranu ba dala rua ne’ebé sei monu iha loron 3 fulan Marsu tinan ne’e, Ministériu Saúde, liu husi Saúde Minisípiu Díli (SMD), servisu hamutuk ho Banku de Sangue Hospital Nasional Guido Valadares (HNGV), sei hala’o aktividade doasaun ran, hodi tulun pasiente sira iha HNGV nomós hospital referensia sira.
Diretora Saúde Munisípiu Díli, Agustinha da Costa Saldanha Segurado hateten, objetivu husi aktividade doasaun ran ne’e, hanesan aktividade kontinuasaun husi aktividade sira seluk hanesan, tratamentu especial ba veteranu ne’ebé mak SMD hala’o hodi komemora loron veteranu ba dala rua.
“Aktividade ohin hanesan aktividade kontinuasaun husi aktividade sira seluk hanesan, aktividade tratamentu especial ne’ebé mak Ministériu Saúde fó orientasaun ba Munisípiu hotu, inklui Munisípiu Díli, ita hahú ho loron Veteranu sira-nian ne’ebé mak sei monu iha loron 3 fulan Marsu tinan ne’e. Ita hahú kedas iha loron 21, ita halo tiha ona konsulta espesial ida ba veteranu sira, idojus nomós difisiensia sira ne’ebé ita fó asistensia ida ne’e, ne’ebé mak ita hahú ona iha Atauro, Metinaro nomós ohin iha Becora”, hateten Agustinha da Costa Saldanha Segurado, ba jornalista sira iha Centro Saúde Vera-Cruz Díli, Kinta (28/2/2019).
Agustinha haktuir, aktividade doasaun ran ne’e, SMD realiza tanba servisu hamutuk ho entidades sira hanesan, PNTL no universidade balun iha Díli laran hanesan, Universidade Oriental Timor Lorosa’e (UNITAL), Institutu Ciensia Saúde (ISC) no seluk tan.
“”Ita-nia maluk moras sira ne’ebé mak oras ne’e dadaun presiza ran, no ita mós halo aktividade tratamentu espesial, atu nune’e ita-nia veteranu sira bele hetan tratamentu ne’ebé mak di’ak”, hateten Agustinha.
Iha fatin hanesan, estudante UNITAL, Amaro da Costa Tilman, hakarak oferese ran ho gratuitamente ba HNGV, tanba alende atu salva ema nia vida, hanesan juventude nasaun ida ne’e, hakarak mós oferese nia ran hanesan mós veteranu Timor-oan sira hotu ne’ebé durante funu oferese sira nian aan tomak ba rai ida ne’e hodi bele hetan ukun rasik aan.
“Nu’udar umanu ida, oinsa atu ajuda ita-nia maluk sira, ha’u laiha buat ida atu ajuda, maibé liu husi doasaun ran de’it mak ha’u bele halo, nune’e ha’u bele ajuda ha’u nia kolega familia no se de’it mak presiza ran, no hanoin fila fali ba istória Timor nian, ne’ebé mak ita-nia heroe sira oferese sira nia isin no sira-nia ran hodi salva ita-nia rain, entaun iha momentu ida ne’e ita mós bele oferese ita-nia ran hodi salva ita-nia maluk sira”, Amaro da Costa hateten.
Tuir planu, aktividade doasaun ran no tratamentu espesial ba veteranu sira mós sei hala’o iha Postu Administrativu hotu iha Díli laran.ola
