Pandemia Corona Virus Disease 2019 (COVID-19) ne’ebé daet maka’as los iha mundu tomak halo estudante Timor-oan sira iha Repúblika Indonézia (RI) sente ameasadu, tanbá labele asesu ba ai-hán ne’ebé sufisiente.
Numeru COVID-19 ne’ebé kontinua aumenta iha Indonézia atinje ona ba 309, husi númeru refere ema nain 19 mak mate no 11 konsege rekopera.
Tuir informasaun ne’ebé Jornalista GMN asesu husi estudante Timor-oan sira neebé hela iha Bandung, Indonézia, dadaun ne’e kondisaun iha Bandung indonesia izoladu tebes tanba atividade hotu taka no estudante barak tenke halo aprendizajen online.
Estudante Timor-oan ne’ebé hala’o estudu iha Universidade Sangga Buana YPKP Bandung Indonézia, Ildegarda Isabel Amaral hateten, dadaun ne’e sira sente ameasadu tanba labele la’o sai ho seguru hodi buka ai-han ne’ebé sufisiente.
“Ami sente tauk no afetadu tebes relasiona ho virus corona tanba virus ne’e aumenta be-beik, kona-ba eskola ami nia eskola taka no ami idak-idak hodi hein izame online, nesesidade loron-loron sente sei diak tanbá balun mak loke maibé la’o ho tauk hodi kompras, maske ho antiseptik ne’e menus maske iha loja balun fa’an maibé ho folin ne’ebé karun tebes,” dehan, Ildegarda ba GMN liu husi Media Sosial, (19/03/2020).
Ildegarda hatutan katak, oras ne’e dadauk hela hamutuk ho nia belun Timor-oan nain 4 iha uma kos ida deit ne’ebé eskola iha Universidade Sangga Buana YPKP Bandung Indonézia.
Ildegarda esplika to’o agora sedauk hetan kontaktu ruma husi embaixada relasiona ho situasaun iha Indonézia maibé estudante sira hein hela planu governu nian kona-ba evakuasaun maske iha hela prosesu aprendizajen nia laran.Ida
