Parlamentu Nasionál (PN) kinta lejislatura, liu hosi plenária Segunda (9/3/2020), fó votu pezár ho unanimidade ba eis deputadu asembleia konstituente, Clementino dos Reis Amaral, hodi fó omenajen no onra ba kontribuisaun saudozu nian ho votu a favor 37 kontra 0 no abstensaun 0.
Iha plenária, deputadu bankada Fretilin, David Dias Ximenes “Mandati” sujere ba meza PN, atu fó votu pezár mós ba matebian veteranu Afonso Rangel ne’ebé hakotu iis iha loron 28 fulan Fevereiru tinan ne’e, hodi fó onra ba luta saudozu nian, ba Timor-Leste nia independensia.
“Nia (Afonso Rangel Tatamou) merese hetan votu pezár, tanba nia envolvimentu iha rezistensia boot tebes, ita labele haluha ida ne’e,”hateten Mandati iha plenária, Segunda(09/03/2020).
Hatán ba sujestaun ne’e, Prezidente Parlamentu Nasionál interinu, Luis Roberto da Silva, afirma, asuntu refere pertinente, no sei prepara iha ajenda plenária tuir mai.
“Sei hato’o fila fali ba reuniaun líder bankada, atu tau iha konsiderasaun, para bele prepara ajenda ida ne’e ba plenária tuir mai,
tanba agora dadaun ita hein hela ita nia maluk, mate isin Sr. Clementino dos Reis Amaral.
tanba ne’e kona-bá Tatamou ami tau iha konsiderasaun.”dehan Luis Roberto.
Entertantu, matebian Clementino dos Reis Amaral, hanesan deputadu iha primeira lejislatura asembleia konstituente, reprezentante husi partidu Kota nian.
Matebian hakotu iis iha loron 08 fulan Marsu tinan 2020 ne’e.
aleinde ne’e, matebian saudozu Afonso Rangel Tatamou, hakotu iis iha loron 28 fulan Febreiru tinan ne’e.Say
