Prezidente Parlamentu Nasionál (PPN), Arão Noe de Jesus da Costa Amaral garante, ho selebrasaun loron nasionál veteranu ba dala tolu nian, inklui ho estabelesimentu Konsellu Nasionál Veteranu (KNV), sei solusiona problema no preokupasaun ne’ebé veteranu barak sei hasoru, liu-liu bele dignifika di’ak liutan moris veteranu sira nian.
“Hein katak ho Konsellu Veteranu ne’ebé mak harí ona, bele halibur veteranu hotu iha sumbrina ida de’it nia okos, nune’e bele rezolve problema sira ne’ebé liga ba veteranu nia moris lor-loron, mezmu simu tiha ona orsamentu ruma hodi apoiu sira, maibé sira iha lamentasaun nafatin katak, seidauk sufisiente no buat sira ne’e hotu, tanba ne’e, hein katak, ho konsellu veteranu ne’ebé mak harí ona, bele solusiona situasaun sira ne’e hotu, tanba agora sira barak lamenta, liu-liu kona-bá rezidensia uma hela fatin ba sira, tanba komisaun ne’e harí ona”, afirma PPN Noe ba jornalista sira iha PN, Segunda (02/03/2020).
Líder órgaun lejisladór garante, ho komemorasaun loron veteranu ba dala tolu ne’e, sei refleta no inspira liu foinsa’e sira, atu kontinua luta ba dezenvolvimentu Timor-Leste nian.
“Hein katak, ho komemorasaun ba dala tolu no semináriu ne’ebé iha, bele refleta fali instória ne’ebé iha passadu iha, nune’e para joven sira ne’ebé moris iha 2000 mai ne’e bele hatene mós istória pasadu nian luta to’o mai ukun aan iha 2002”, Tenik Arão.
Entertantu, loron nasionál ba veteranu ne’e, selebra iha loron 03 fulan Marsu, no ba tinan ne’e, selebra iha Palásiu do Governu.say
