Komunidade barak husi Munisípiu sira seluk ne’ebé hela iha Díli, dezloka ba sira-nia moris fatin (Foho/ida-idak ninia munisípiu), hodi prevene-an hosi surtu COVID-19.
Antes implementa serka sanitária, ba munisípiu Díli, iha tuku sanulu resin rua kalan, komunidae husi munisípiu ne’ebé mai hela iha Díli, desidi dezloka ba sira-nia munisípiu ida-idak, tanba atu halo prevensaun ba COVID-19.
Komunidade maioria ne’ebé ba munisípiu hanesan Baucau, Lautem no mós muisípiu sira seluk, tanba kapitál nasaun, rejista kazu pozitivu COVID-19 aumenta hela de’it.
Komandu Polísia Nasional Timor-Leste (PNTL) Munisípiu Díli husu pasajeiru sira atu uza uza máskara no mantein distansiamentu sosiál.
“Imi hotu-hotu hatene ona hahú husi zero-zero oras lockdown iha kapitál Díli, depois imi dehan komandante ne’e bosok, antes tuku 12 kalan ne’e imi liu ona Manatuto, maibe halai ho kuidadu, labele imi duni oras, depois imi hetan fali asidente. Depois imi haree kondutór halai maka’as imi kontaktu mai ha’u, atu nune’e ha’u kontaktu Polísia iha Baucau no Lautem bele kaptura. Bus ne’ebé mak tama iha Díli tenke ho kritéria, mas nia tama iha Díli labele sai ona ba munisípiu”,esplika Segundu Komandante PNTL munisípiu Díli Superintendente Euclides Belo, ba jornalista sira Tersa (09/0321), iha Tasi-Tolu, Díli.
Observasaun GMN hatudu katak, pasajeiru sira ne’e, balun ho sira-nia transporte privadu hanesan motorizada, no kareta privadu no balun ho transporte públiku.
Alénde Becora, iha área estasionamentu Tasi-Tolu, PNTL obriga negosiante sira, husi munisípiu tenke fila ba sira-nia munisípiu antes tuku sanulu resin rua kalan.
Maibé sira ne’ebé kontinua iha Tasi-Tolu, to’o tuku sanulu resin rua liu, PNTL obriga sira tenke fila-fali mai Díli, tanba regra serka sanitária tama ona iha implementasaun.avi
