Sekretaria Estado Formasaun Profesional no Empregu (SEFOPE) selebra akordu ho Ajensia KONNEKTO, ISAT no SOLS hodi kapasita formasaun ba timor-oan sira antes ba serbisu iha rai liur.
Akordu refere asina husi SEFOPE reprezenta husi Diretor Jeral ba Asuntu Profesional no Empregu, Paulo Alves no liderança ajensia KONNEKTO, ISAT no SOLS asiste direta husi Sekretario Estado Formasaun Profesional no Empregu Julião da Silva.
“Governu asina akordu tolu ho parseiro tolu, rua ho ISAT seluk ho KONNEKTO ho objetivo oinsa serbisu liga ho trabalhador timoroan sira ne’ebe hakarak atu buka servisu iha rai liur, KONNEKTO ho ISAT hanesan ajensia ne’ebe ejiste kleur iha Timor-Leste”, hateten Diretur
Jeral ba Asuntu Profesional no Empregu SEFOPE, Paul Alves ba Jornalista sira hafoin asina akordu ne’ebe hala’o iha salaun SEFOPE, Caicoli, Dili, Tersa (16/04/2019).
Paulo Alves hatutan, ISAT nudar ajensia ida ne’ebe loke iha TL, maibe KONNETOKTO nudar ajensia ida ne’ebe hakarak halo rekrutamentu ba timor-oan sira ne’ebe hakarak ba servisu iha rai liur. Ne’ebe parseiro rua ne’e importante teb-tebes ba Governu TL hodi servisu hamutuk forma timoroan sira ne’ebe hakarak ba servisu iha rai liur, hanesan Australia, no rai seluk ne’ebe presija trabalhador timoroan nian.
Aleinde ne’e SEFOPE asina mos akordu ho SOLS hodi fo formasaun lian inglés ba timor-oan sira, aleinde lian Inglés, fó mos formasaun lian Korea no Japaun, tanba dadaun ne’e SEFOPE serbisu hamutuk ho Korea hodi haruka trabalhador ba serbisu iha Korea, tuir planu haruka mos ba Japaun.
Akordu ne’e foin asina ba dahuluk, maske nune’e kona ba Ajensia ISAT durante ne’e servisu hamutuk ho SEFOPE kleur ona.
Iha fatin hanesan, Manager operasional Ajensia KONNEKTO, Aniceto Pereira Barros, hateten, Ajensia KONNEKTU nia objetivu maka atu redus dezempregu iha Timor-Leste, tanba ne’e ho hanoin ida atu kapasita timor-oan sira liu husi formasaun nune’e bele ba servisu iha rai liur.
“KONNEKTO iha hanoin ida katak buka atu redus dezempregu iha Timor-Leste, liu husi servisu hamutuk ho Estado. Tan ne’e KONNEKTO serbisu hamutuk ISAT ho Estado ho objetivu fasilita timoroan sira bele ba servisu iha rai liur, aleinde ne’e KONNEKTO mos hala’o parseria ho empregador husi rai liur hodi nune’e bele simu timoroan sira bele ba serbisu iha liur, ida ne’e maka KONNEKTO ho ISAT halo hodi fasilita timoroan sira, nune’e fila mai dezenvolve ita nia rain”, hateten, Manager operasionnal Ajensia KONNEKTO, Aniceto Pereira Barros.
Aniceto P. Barros esplika, KONNEKTO serbisu hamutuk ho ISAT, tanba ISAT maka fo
formasaun ba timor-oan sira no serbisu direitamente ho Sentru Formasaun sira hodi prepara
timor-oan sira antes ba servisu iha estranjeiro, formasaun ne’ebe durante fasilita maka iha area hospitalidade, konstrusaun, peskas no seluk tan.
Nune’e mos, Diretora Jeral Ajensia ISAT, Ana Paula da Costa Xavier, hatete Ajensia ISAT fo Ona formasaun ba timor-oan hamutuk 10.000.
“Ami fo ona formasaun besik 10 mil, bainhira ami estabelese ami fo formasaun ba ema hodi responde ba nesessidade husi kompañia mina ho gas ninian, maibe iha Governu nian mos
ami fo formasaun hanesan Forsa Defeza no mos ho seluk tan. Objetivu husi involvimentu iha asina akordu ne’e, atu prepara timoroan liu husi fornesementu formasaun ne’ebe maka tuir duni padraun internacional nune’e timoroan sira bele asesu ba empregamentu la’os deit iha rai laran, maibe mos ba rai liur”, dehan Diretora .
Entretantu durasaun akordu ne’e durante tinan 2, maibe depende ba avaliasaun, kuandu iha progresso signifikativu possível ba renovasaun. mia
