Universidade Nasional Timor Lorosa’e (UNTL) halo ona kontratu tranversais ho dosente tolu nulu resin haat (34) hodi manorin iha UNTL, maibé sai preokupasaun salariu ba fulan marsu nian to’o agora seida’uk simu.
Iha intervista ba GMN, Dosente Jeca Oliveira Guterres hatete, maske kompleta ona servisu durante ne’e, maibé la simu saláriu, no pior liu sira la hatene prosesu ne’e to’o ne’ebé ona, tanba lahetan informasaun husi parte Administrasaun Universidade Nasional Timor Lorosa’e (UNTL).
“Ami nia salariu marsu nia ne’e, lolos ne’e sai ona iha dia 25, maibé to’o agora ami seidauk hetan salariu iha fulan marsu nian,tanba ne’e maka mai hakarak hato’o atu nune’e, sira bele prosesa,sira ne’ebé servisu iha adminstrasaun mós hanesan se bele sira servisu nafatin,atu nune’e bele prosesa ami nia osan durante fulan marsu nian, maibé to’o agora ami seidauk hetan ami nia salariu”, hatete, Jeca Oliveira ba GMN, Kuarta(01/04/2020) iha kampus sentral UNTL.
Dosente Jeca hatutan, Estadú Emerjénsia ida ne’e, halo sira tenki ejiji ba parte universidade, atu bele selu sira nia saláriu, hodi nune’e bele sustenta nesesidade uma laran.
“Sim ami seidauk iha klarifikasaun, tanba sira dehan deit orsamentu la to’o mai ami, tanba saida maka ami kontratadu ami hala’o tiha ona ami nia dever, maibé to’o agora ami seidauk hetan ami nia dereitu, lolo’os ami tenki simu ami nia dereitu atu nune’e ami bele uza momentu situasaun emerjensia ida ne’e”, dehan, Jeca Oliveira.
Dosente ne’e mós husu, atu parte administrasaun tenki ativu servisu, nune’e bele rezolve lalais sira nia problema, no mós ameasa wainhira lahetan klarifikasaun husi parte universidade, sira sei para servisu.
Bainhira jornalista GMN tenta halo klarifikasaun, husi parte administrasaun UNTL maibé sira laiha fatin.Jen
