Arsebispu Arkedioseze Díli, Dom Virgílio do Carmo da Silva, SDB, husu ba Prezidente Repúblika eleitu, tenke hakoak povu hotu, tanba povu fó ona fiar hodi sai Xefe Estadu ba povu tomak.
“Hanesan ha’u dehan fila-fila ona katak, se deit maka povu fó fiar, atu sai PR hanoin primeiru maka PR ne’e aman ba nasaun, aman ne’e dehan hakohak ema hot-hotu, la husik hela oan ida iha liur, kuandu sai aman ba nasaun laiha ona dehan katak, ha’u-nia grupu ida ne’e, ha’u-nia grupu ida ne’ebá, maibé haree ema hotu hanesan tanba maioria povu ne’e fó hotu votu atu sai aman ba rai ida ne’e.
“Tenke ezerse ninia kbit ne’ebé ita bolu nu’udar aman ida ne’e, hakoak hanesan ita hotu sempre dehan katak, sai sinál unidade ninian, ida ne’e maka primeiru ita hotu hakarak husi prezidente,” hatete Dom Virgílio do Carmo da Silva,SDB iha Sentru Votasaun Sede Suku Bidau Lesidere, Díli, Tersa (19/04/2022).
Dom Vírgilio esplika, Konstituisaun maka sai sasukat ba ema hot-hotu hodi lori nasaun ida ne’e, iha paz no prosperiedade no hadomi demokrasia ne’e to’o rohan.
“Hanesan ita hotu hatene diak katak, ida ne’ebé bali ita-nia konstituisaun atu nune’e aman ida, maibé nia hatene katak, la’os aman ida hakuak maibé hatene tau mós disiplina atu oan hot-hotu la’o iha dalan ne’ebé lolos katak sasukat atu bele garante katak rai ne’e la’o los ne’e maka ita-nia konstituisaun” tenik Dom Virgílio.
Arcebispo husu ba PR eleitu tenke besik ba ninia povu, labele deit iha tempu kampaña maka besik ba povu, maibé iha tempu bai-bain tenke buka hakbesik a’an ba povu, hodi hatene liu povu nia aspirasaun.
No elojia eleisaun primeiru volta ne’ebé la’o ho di’ak, tanba ne’e husu ba sidadaun hotu-hotu, atu la’o tuir ezemplu, ne’ebé hatudu ona iha votasaun primeira volta, to’o fó sai nia rezultadu.eni
