GMN TV Nasional UE-CPLP: ElPrez segunda volta la’o di’ak

UE-CPLP: ElPrez segunda volta la’o di’ak

39 views

Observadór internasionál Uniaun Europeia (UE) ba Eleisaun Prezidensiál (ElPrez) observa katak, prosesu eleisaun segunda volta ne’e la’o diak no susesu.

Xefe Observadór Misaun Observasaun Eleitorál Uniaun Europeia, Doménec Ruiz Deveza hatete, ElPrez segundu volta ne’ebé hala’o iha loron 19 fulan ne’e, la’o ho hakmatek no tuir régra ne’ebé órgaun eleitorál estabelese.

“Preparativu sira ba votasaun organizadu tebes husi parte autoridade eleitorál sira no loron eleisaun la’o ho kalma no orden. Observadór Uniaun Europeia sira fó avaliasaun pozitivu ba prosesu votasaun no kontajen, José Ramos Horta no Francisco Guterres Lú Olo konkore iha kampaña ida ne’ebé respeita liberdade fundamental sira,” afirma Xefe Observadór Misaun Observasaun Eleitorál UE, Doménec Ruiz Deveza, liuhosi Konferénsia Imprensa Kuarta, (20/04), iha Otél Timor Díli.

Durante períodu votasaun, observadór Uniaun Europeia vizita estasaun votu hamutuk 164 iha munisípiu 12 no Rejiaun Administrativa Espesiál Oé-Cusse Ambeno (RAEOA).

“Em jerál, observadór EU avalia katak, votasaun no kontajen hanesan di’ak ka di’ak tebes iha estasaun votu hotu ne’ebé observa no deskreve atmosfera hanesan hakmatek” afirma Doménec Ruiz. UE mós nota, mídia balun nia espasu kobertura ba kandidatu sira la balansu.

Iha relatóriu preliminária ne’e hatudu, partisipasaun feto sira iha eventu kampaña segunda volta ho númeru ki’ik liu duke primeira volta, fó atensaun oitoan deit ba hakbi’it feto.

“Observadór EU ne’ebé akompaña besik eventu 62 nota katak, feto sira partisipa ho menór númeru duké iha primeira volta” hakotu.

Xefe Observadór Misaun Observasaun Eleitorál UE ne’e hato’o mós parabens ba Komisaun Nasionál Eleisaun (CNE-sígla Portugés), no Sekretariadu Tékniku Administrasaun Eleitorál (STAE) nia servisu hodi realiza prosesu eleisaun ne’e la’o ho diak no susesu.

Kona-bá relatóriu finál, UE sei iha faze elaborasaun, bainhira termina mak foin aprezenta ho rekomendasaun sira durante prosesu Eleisaun Prezidensiál hahú husi primeira volta no segunda volta 2022.

Alende ne’e, Misaun Observasaun Eleitorál CPLP mós la identifika irregularidade iha eleisaun prezidensiál segunda volta ne’e.

Prezensa misaun observasaun eleitorál da CPLP iha eleisaun prezidensiál segunda volta liu husi pedidu ne’ebé hato’o husi Governu Timor-Leste.

Objetivu husi pedidu ne’e atu husu misaun observasaun eleitorál CPLP hodi observa prosesu eleisaun preizidensiál segunda volta ne’ebé realiza ona iha loron 19, fulan-abril, tinan ne’e.

Durante eleisaun prezidensiál segunda volta misaun observasaun eleitorál CPLP aloka ekipa observadór sira iha munisípiu ha’at hanesan munisípiu Díli, Baucau, Ermera no Manatuto hodi hala’o observasaun iha sentru votasaun hirak ne’e.

“Misaun Observasaun CPLP haree katak, sentru votasaun sira asesivel, kumpri oráriu abertura no enseramentu,” dehan Xefe Misaun Observasaun Eleitorál CPLP, José Alves Guerreiro Alves Primo, iha Díli.Lau/Tos


Banner

Foto

Notisia Ikus

PN pede às autoridades sanitárias que inspecionam carne vendida nas bermas das estradas

July 1, 2022
O deputado da bancada da Frente Revolucionário ...

Inflasaun Global halo TL lakon retornu investimentu FP biliaun USD 1.6

July 1, 2022
Ministru Finansan, Rui Agusto Gomes hateten, dur...

Xanana husu nasaun hotu atu proteje Oceano ho baze iha siénsia no inovasaun

June 30, 2022
Líder Nasionál Kay Rala Xanana Gusmão, husu b...

SEFOPE sei hamenus númeru dezempregu iha rai-laran

June 29, 2022
Sekretaria Estadu Formasaun Profísional no Empr...

AJAR apresia TR deside Projetu-Lei Responsabilidade PR inkonstitusionál

June 29, 2022
Diretór ezekutivu Asia Justice And Right (AJAR)...
1 2 3 742

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker