Antigu líder rezisténsia ba libertasaun nasionál, Kay Rala Xanana Gusmão, hatete, atu evita problema iha rai-laran, husu ba grupu oi-oin ne’ebé ema balun forma atu hakmatek.
“Ha’u apelu boot ba povu tomak atu hakmatek, labele provoka malu, ha’u husu bo’ot ba grupu oi-oin ne’ebé rona dehan forma iha ne’e, forma iha ne’ebá, favor ida hakmatek, lalika estraga imi-nia an rasik, lalika estraga ema seluk. Se mak lakon, lakon. Ne’e demokrasia, povu mak hili,” dehan Xanana Gusmão, iha Balibar, Díli, Tersa (19/4/2022), hafoin ezerse direitu votu.
Eis Prezidente Repúblika ne’e mós husu ba líder polítiku sira hotu atu labele provoka tun-sa’e hodi deseztabiliza nasaun.
“Ne’ebé rona katak, buat sira ne’e prepara hela, ha’u husu no halo apelu haraik-an ba sira hotu para labele book situasaun hodi estraga povu nia moris” deklara Xanana.
Kona-ba eleisaun prezidensiál segunda volta ne’e, Xanana dehan, nu’udar sidadaun, nia fiar katak, kandidatu Prezidente Repúblika, José Ramos Horta manán. “Manán ka lakon, demokrasia hanorin mai ita katak, manán mos simu, lakon mos tenke simu” hakotu.Nes