Guarda Jestaun Merkadu Munisípiu Díli (GJMMD), ne’ebé servisu hamutuk ho komandu Polísia Nasionál Timor-Leste (PNTL) Unidade Taskforce, sei halo greve ba vendador sira ne’ebé kontinua fa’an sasan iha estrada públiku no iha edifísiu balun nia oin iha kapital Díli.
Xefe Jestaun Merkadu Munisípiu Díli, Berta Santa G Veira, hateten, Governu aprova ona dekretu lei 30/2008, maibé to’o agora seidauk implementa iha terenu, bainhira Guarda Munisípiu Díli obriga muda vendedores sira ne’ebé fa’an sasan iha estrda ninin ba merkadu Manleuana no Taibesi, maibé sira fila-fali hodi kontinua fa’an iha estrada ninin kapital Díli.
“Iha ona dekretu lei númeru 30 /2008, maibé seidauk implementa iha terenu, tanba ne’e mak bainhira Jestaun Munisípiu Díli hasai vendadores sira lori ba merkadu Manleuana no Taibesi hodi fa’an sasan iha ne’eba, maibé vendedores sira ne’e fila fali kontinua fa’an iha estrada públiku. Atu prevene situasaun hirak ne’e, Munisípiu Díli mós halo ona sosializasaun no fahe mós brosura ba komunidade ka negosiante sira, maibé negosiante sira kontinua fa’an sasan iha fatin públiku, nune’e ba oin husi parte jestaun merkadu Munisípiu Díli sei koloka pessoal seguransa balun iha fatin públiku sira ne’ebé identifikadu tama iha proibisaun tuir dekretu lei haruka”, hateten Berta Santa G Veira iha nia kna’ar fatin Matadoro Díli, Segunda (27/05/2019).
Berta mós husu ba vendedores sira ne’ebé sei kontinua mantein fa’an sasan iha estrada públiku atu ba fa’an sasan iha Merkadu Manleuna no Taibesi, ne’ebé Governu prepara ona, nune’e bele kontribui ba prevensaun tráfiku ka asidente iha estrada públiku sira iha sidade Díli, tanba dalaruma vendedores sira ne’e fa’an sasan to’o estrda laran, hodi fó mós impaktu ba movimentu transporte iha sidade laran, liu-liu iha área eis-merkadu Comoro nian.
Entretantu, tuir observasaun GMN nota katak, fatin ne’ebé vendedor sira kontinua fa’an sasan mak hanesan iha estrada eis-merkadu Comoro, Elemloi nia sorin rotunda Prezidente Nicolau Lobato parte leten, no Bidau Lecidere.aba
