Sosiedade Sivil (SS) liu hosi Forum Organizasaun Naun Governamental Timor-Leste (FONGTIL), sei destaka ekipa ba iha Suku sira hodi monotoriza prosesu distribuisaun subsídiu USD 100.00, bazeia ba dekretu lei númeru 15/2020 ba kada uma kain.
“Ekipa ida ne’e sei destaka ba suku sira iha territoriu Timor, atu tau matan ba prosesu tomak distribuisaun subsídiu 100 dolar ba kada familia”,dehan Diretór Ezekutivu FONGTIL, Daniel dos Santos, liu hosi komferensia imprensa Kuarta (20/05/2020) iha Kaikoli Díli.
Diretór Ezekutivu FONGTIL, hatutan parte SS hetan ona informasaun intgeradu hosi Ministériu Solidariedade Sosial no Inkluzaun (MSSI) katak, osan subsídiu 100 dolar sei halo transferensia ba konta bankaria suku nian, nune’e Banco Nasionál Komersiu Timor-Leste (BNCTL) sei transporta ba Postu hafoin suku foti hodi lori suku, tanba ne’e hosi parte SS sente preokupadu konaba seguransa ba osan.
“Ekipa ne’ebé atu halo pagamentu, ita lakoi sira atu komite iha irregularidade ruma hodi uza sala osan inklui osan ne’ebé hela iha suku se mak atu tau matan, maske ita hatene katak F-FDTL no PNTL sei envolve iha ekipa maibé ita antesipa hodi destaka ekipa ba iha kada suku sira hodi halo monotorizasaun”subliña Daniel.
Diretór ne’e realsa, atu garante katak prosesu distribuisaun subsídiu lao duni iha ambitu ida transparansia akuntabel no hases ita nia ekipa hosi aktu subornu, tanba ne’e mak ami alert aba públiku katak FONGTIL ho nia membru sira, Organizasaun CBO rede iha Munisipiu inklui ONG sira, sei halo monotorizasaun ba prosesu pagamentu iha suku hotu.
“Ami apresia ho planu MSSI nian, ne’ebé sei iha meza ba reklamasaun iha prosesu pagamentu tanba ne’e ami espera katak, meza ne’e bele fúnsiona no SS bele tama iha ne’eba tanba la kleur tan SS sei halo akordu ho MSSI hodi fó biban ba SS ho nia ekipa karik, iha buat ruma akontese ami bele hase tuir baze legal ne’ebé FONGTIL halo ho MSSI”.
Meus ne’ebé ekipa uza hodi akompañia prosesu tomak mak, ekipa sei tama ba iha suku sira ho vontade no ekipa sira hodi aprezenta an ba autoridade lokal sira, no ekipa ne’ebé destaka iha direitu atu hase karik, sira identifika ruma lalos durante distribuisaun subsídiu ba familia sira, realsa Diretór ONG FONGTIL.
“Ami iha membru ONG Nasionál no Internasionál hamutuk 230, ida ne’e automatikamente sei destaka iha Munisipu tanba sira iha Munisipiu. Iha Munisipiu 12 inklui RAEOA iha rede hamutuk 13 no iha Nasionál iha rede lubun ida, tanba ne’e rede sira ne’e ami sei konsentra hodi tau matan ho efetivu ba prosesu tomak distribuisaun subsidu ba kada familia iha territoriu Timor”.Fel
