Atu fahe subsídiu dollar atus ida ba kada família, Ministeriu Solidariedade Sosial no Inkluzaun (MSSI), sei hein dadus kompletu husi, Ministeriu Administrasaun Estatal (MAE).
“Kona-ba dadus ita hein hela husi MAE, atu nune’e bele haree ba subsídiu USD 100,00 no iha Sesta (08/05/2020), MAE foin fó dadus kompletu ba iha MSSI, atu nune’e bele prepara ona ba prosesu pagamentu, tamba iha fulan maio nia laran presiza rezolve hotu subsidiu ne’e,” dehan, Ministra Solidariedade Sosial, Armanda Berta, iha Ministeriu Finansas-Aitarak laran, Kuarta (06/05/2020).
Ministra ne’e esplika, husi kada familia asina ona no haruka ona ba Ministeriu Finansas, ne’e kona-ba fundus COVID-19 nian, maibé kona-ba mekanismu implementasaun, tamba ne’e MSSI atu prosesa dokumentus ruma, presiza hein dadus husi MAE.
Governante ne’e subliña, MSSI kontinua servisu hamutuk ho MAE, atu nune’e bele aselera lalais subsídiu ne’e ba komunidade sira, ho ida ne’e Sesta agora MAE konsentra hamutuk ho MSSI hodi kompleta dadus ne’e, tamba dadaun ne’e MAE mós hein hela dadus balun husi administradór sira.
“Durante ne’e ha’u labele fó sai informasaun tamba, subsídiu ne’e sei iha prosesu nia laran, bainhira fixu ona mak foin fó sai informasaun, tamba dadaun ne’e iha situasaun COVID-19 nian, ita labele halo buat ida ses husi asuntu ne’e” afirma, MSSI Armanda Berta.Cin
