Reprezentante povu iha uma fukun Parlamentu Nasionál (PN), liu-liu deputadu bankada FRETILIN, Alexandrino Cardoso preokupa ho situasaun ne’ebé komunidade munisípiu Covalima, postu administrativu Fatululik balun, kontinua moris iha nakukun laran no susar atu sira nia produtu ba merkadu, tanba kondisaun estrada la favoravel.
“Kona-bá eletrisidade la’ós iha munisípiu Covalima de’it, maibé mós iha iha suku no aldeia barak, to’o ohin loron ita ukun rasik-an besik tinan 20 sira seidauk sente naroman husi ukun rasik-an, ha’u koalia liu ba iha munisípiu Covalima, postu administrativu Fatululik, tanba aldeia lima (5), aldeia rua de’it mak asesu ba eletrisidade. Maibé aldeia tolu (3) seluk ne’ebé ho populasaun barak to’o ohin loron estrada de’it mós lamenta kona-bá eletrisidade, tanba to’o ohin loron seidauk asesu no moris iha nakukun laran, nune’e agora sira sunu kami fila-fali tempu beiala ni’an“, deputadu bankada FRETILIN ne’e liu husi plenária iha PN, Segunda (29-06-2020).
Ho nune’e, Alexandrino husu ba Governu bainhira aprezenta Orsamentu Jerál Estadu (OJE) tinan 2020 ho 2021, tenke haree mós ba kestaun refere.
“Ita balun goja iha naroman, barak mak sei moris iha nakukun nia laran, nune’e husu ba Governu bainhira aprezenta OJE tinan 2020 ho 2021, bele tau konsiderasaun ba problema hirak ne’e”, afirma deputadu bankada FRETILIN ne’e.
Hatán ba kestaun ne’e, Ministru Reforma Lejislativa Asuntu Parlamentár no Komunikasaun Sosiál (MRLAPKS), Francisco Jerónimo, hateten, ho orsamentu duodesimu Governu labele hatán preokupasaun povu ne’ebé mak PN hato’o.
“Ita nia problema agora mak ita la’o ho dotasaun orsamentu temporáriu, ita labele halo buat hotu iha tempu ida de’it, kontratu sira mós fulan tolu (3) ou hat (4) selu dala ida la’e programa mós hanesan ne’e, tanba ne’e, hafoin OJE PN aprova projetu on going sei kontinua “, klarifika Governante ne’e.
Entretantu munisípiu Covalima, postu administrativu Fatululik, kompostu husi suku Taroman ho suku Fatululik, ho ninia populasaun hamutuk rihun 300 resin. ety
