Mosu deklarasaun inserteza ba subsídiu pursentu 60 ba traballadór no empreza halo husi Ministériu Solidariedade Sosial no Inkluzaun (MSSI), nune’e implika ba traballador balun to’o oras ne’e seidauk simu osan refere.
Hafoin retiru VIII Governu, Sexta (26-06), GMN tenta konfirma promesa governu nian konaba subsídiu % 60 ba traballadór no empreza, ba Vise Ministra Solidariedade Sosial no Inkluzaun (MSSI), Signi Verdial, maibe governante ne’e hateten, subsídiu refere oras ne’e dadauk sei iha hela faze verifikasaun dadus.
Enkuantu tuir informasaun ne’ebé GMN hetan husi traballadór estranjeiru balun iha empreza privadu balun hateten, nia simu duni transferensia pagamentu subsídiu estraordináriu ho montante total hanesan ho porsentu 60 husi nia saláriu mensal ba fulan tolu iha fulan ne’e nia laran. Entretantu, traballadór Timor-oan sira to’o oras ne’e seidauk simu pursentu 60 refere.
“Konaba pursentu 60 ne’e oras ne’e dadauk Institutu Seguransa Sosial sei verifika hela dadus. Balun kompletu ona no balun seidauk. Ha’u laiha data até agora parece aban (sábadu) presiza klarifikasaun husi Prezidente Instituto Seguransa Sosial. Ita boot sira rona ha’u foin fila husi retiru ha’u seidauk iha informasaun husi Prezidente Institutu Seguransa Sosial”, esplika.
Antes ne’e Prezidente Instituto Seguransa Sosial, Longuinhos Armando, hateten, iha semana ne’e traballadór hotu sei simu subsídiu porsentu 60 husi nia saláriu mensal ba fulan tolu nian.Oct
