Prezidente Konsellu Kombatente Libertasaun Nasional (CCLN-sigla Portugés), Vidal de Jesus “Riak Leman”, hatete, Prezidente Repúblika (PR), Francisco Guterres Lú Olo preokupa loos kondisaun servisu CCLN ninian no nia sei hato’o ba Primeiru Ministru (PM), Taur Matan Ruak, tau atensaun ba CCLN atu bele iha fatin, hodi hala’o sira-nia servisu.
“Ami nu’udar konsellu ba hasoru malu ho exelensia Prezidente Repúblika, trata asuntu rua, ida mak kona-ba fatin ne’ebé konsellu atu halo servisu, to’o agora ami nia fatin mos seidauk iha, ida seluk mos kona-ba aktividade konsellu nian, kona-ba fatin ne’e Prezidente Repúblika, preokupa no sei ko'alia mos ho PM para kuandu formasaun governu hotu ona, sira bele define ka determina fatin ida ba CCLN”, dehan Riak Leman ba Jornalista sira, Segunda (22/06/2020) iha Palásiu Prezidensial Nicolau Lobato Bairo Píte, Díli.
Nia hatutan, dau-daun ne’e hala’o hela kna'ar iha fatin hanesan iha Serve, ho sala rua deit badak oan, AC mos laiha, tama ba servisu mos minutu ida ita kosar metan sulin, situasaun ida ne’e mak agora konsellu enfrenta hela.
Riak Leman mos akresenta, saida mak konsellu atinji mak organiza harii konsellu munisipal sira iha munisípiu 12 iha teritoriu Timor-Leste hotu ona, halo tiha kongresu nasional no harii konsellu nasional hotu ona, agora hein mos orsamentu para governu tau orsamentu ruma, para sira bele hala’o aktividade, sei tun ba terenu ko'alia ho veteranu sira, iha buat barak mak sei halo ba veteranu sira, soke situasaun impase ne’e mak halo hotu-hotu hein hela orsamentu ne’e.
“Prioriedade mak ida ne’e sei haree mos verifikasaun dadus ne’ebé mak uluk halo hela, tanba orsamentu laiha mak agora para hela, ida fali mak ami iha koordenasaun manas hela ho Prezidente Komisaun omenajen para atu transfere aktividade komisaun omenajen nian ba konsellu, hirak ne’e hotu depois iha mos ezijensia veteranu sira nian, dehan estrutura konsellu tenke tun ba baze ko'alia buat ruma ho sira, haree mos kona-ba sede ba konsellu munisipal sira, transporte konsellu munisipal sira nian, iha buat barak mak sei hala’o, soke orsamentu mak seidauk iha, se orsamentu iha, ami book ona”, tenik líder másimu CCLN ne’e. Oly
