Sekretáriu Estadu ba Igualdade no Inkluzaun (SEII) hamutuk ho United Nation (UN) hahú reativa fali programa inisiativa Spotlight, hodi halakon violénsia hasoru feto no labarik-feto sira.
Sekretária Estadu ba Igualdade no Inkluzaun (SEII), Maria José da Fonseca Monteiro de Jesus, hateten, durante periódu Estadu Emerjénsia (EE) maske programa Spotlight la’o ladun efetivu, maibé informasaun no koordenasaun ho parseriu Ministériu Públiku (MP) no Polísia Nasionál Timor-Leste (PNTL) sira kontinua la’o, hodi fó atendimentu ba vítima sira.
“Ida ne’e programa ne’ebé UN halo esforsu hodi hetan apoiu husi Uniaun Europeia (UE), depois lansamentu ita iha tiha COVID-19, entaun la la’o, entaun kuandu laiha estensaun bele kontinua hodi remata planu tuir programa ne’ebé tau ona, ita prepara ho informasaun sira ne’ebé fo sai durante EE kona-bá violénsia doméstika. Durante EE ekipa husi SEII fahe informasaun no fahe konsensializasaun, SEII koordena ho Ministériu Interior (MI), MP atu halo atendimentu no fornesimentu ba vítima tenke la’o ba nafatin, tanba iha artigu balun ba EE mós tau artigu kona-bá sidadaun hirak ne’ebé hetan problema violénsia bazeia ba jéneru”, hato’o SEII, hafoin hala’o sorumutu ho parseriu sira iha salaun konferénsia UN, Caicoli-Díli, Tersa (23-06-2020).
Koordenadór Rezidente UN iha Timor-Leste, Roy Trivedy, esplika, pograma Spotlight iha atu hamenus violénsia kontra feto no labarik feto.
Enkontru ho SEII atu prepara reuniaun kona-bá Sharing Comunity Spotlight ne’ebé partisipa husi reprezentante ajensia sira hanesan sosiedade sivíl no ajensia UN ni’an ne’ebé servisu iha programa spotlight ne’e.
Programa inisiativa Spotlight atu halakon violénsia hasoru feto no labarik-feto sira ne’e lansa iha loron 5, fulan Marsu, tinan ne’e, hodi fó prioridade ba munisípiu Ermera, Bobonaro no Viqueque ho investimentu tinan tolu (3) hamutuk USD millaun 15, ne’ebé apoiu husi UE. ida
