Líder karismátiku Kay Rala Xanana Gusmão, hateten, maske iha Timor-Leste kazu pozitivu ba moras Corona Virus Disease 2019 (COVID-19) laiha ona, maibé moras iha nasaun barak sei kontinua, tanba moras ne’e seidauk iha ai-moruk atu kura.
“Estadu Emerjénsia (EE) hotu mós ameasa COVID-19 sei kontinua, ita tama sala-ita mate barak, nasaun boot sira mós labele kontrola, apalagi ita”, Líder karismátiku ne’e ba jornalista sira iha aldeia Sepelata-Lospalos, Sábadu (28-06-2020).
Xanana akresenta katak, moras COVID-19 la’ós Timor-Leste nia problema de’it, maibé mundu tomak nia problema, nune’e Timor-Leste tenke kontinua antesipa.
“Iha mundu tomak afeta moras COVID liu 5 juta mate ona, mate bei-beik, loro-loron tama ospital mate bei-beik. Tanba ida ne’e, Timor-Leste mós sai ameasa boot. Mezmu EE laiha ona, mais ameasa COVID sei iha nafatin, tanba bele liu husi fronteira ka sira mai husi aviaun, mais sei tama kuarentena, atu nune’e moras ne’e labele da’et”, tenik líder karismátiku.
Nia hatutan, nune’e virus ne’e mós sai ameasa no perigu boot ba sidadaun hotu-hotu, tanba lakon sira-nia servisu no laiha servisu. Tanba pandémia COVID-19 da’et la-lais ba ema no ema seluk.
Iha sorin seluk, Xanana husu mós ba joven Somocho-Oan sira atu komporta di-diak ho disiplina, tanba mezmu COVID-19 Timor-Leste laiha ona, mais sei bele mosu.
Tanba iha mundu moras refere seidauk para, ema ne’ebé moras ba virus ne’e liu ona 5 juta no hirak ne’ebé mate liu ona rihun 500.
“Tanba ne’e, atu kontrola ka atu evita virus ne’e tama karik, ita la’o arbiru de’it no estraga malu, husu joven sira hahú agora mezmu EE laiha, maibé imi tenke komporta di-di’ak, sai vizaun di’ak Somocho ni’an”, nia dehan. nes
