Koridór liga suku Cribas ba postu administrativu Laclubar sai difikuldade bo’ot ba movimentu transporte públiku, tanba kondisaun estrada iha área refere grave tebes.
Administradór postu Laclubar, Natalino Cabral, hateten, preokupasaun kona-bá estrada ne’e, nia parte haruka ona proposta ba Administradór munisípiu, maibé seidauk iha konfirmasaun, tanba kestaun laiha Orsamentu Jerál Estadu (OJE) ba tinan 2020 ni’an, no mós dezintendimentu entre kompañia lokál sira.
“Meius balun ami hato’o tiha ona liu husi ami nia emprezáriu lokál balun hato’o tiha ona sira nia proposta, jeralmente hotu tiha ona, maibé hela 10 kilómetru ne’e seidauk rezolve, tanba ne’e, husi parte Governu ni’an bele haree parte seluk, maibé diskute mós 10 kilómetru ne’ebé oras ne’e sei pendente hela”, Administradór postu Laclubar ne’e ba jornalista sira, iha postu Laclubar, munisípiu Manatutu, Sábadu (25-07-2020), hafoin partisipa vizita partidu KHUNTO ni’an.
Natalino garante, ho proposta orsamentu tinan 2020-2021 ne’ebé Governu sei aprezenta iha fulan oin, bele rezolve difikuldade estrada ne’e.
Entretantu tuir observasaun GMN iha terenu nota katak, estrada kuaze kilómetru 10 husi kruzamentu liga ba postu administrative Natarbora ba postu Laclubar grave tebes, nune’e mós iha tempu udan difikulta tebes trasporte públiku sira atu halo movimentu.
Postu Administrativu Laclubar kompostu husi suku nen (6) mak hanesan, suku Fatuk Makerek, Funar, Batara, Orlalan, Sananain no Manelima. san
