Arsebispu Metropolitanu, Dom Virgílio do Carmo da Silva, SDB, hateten, atu harii hikas meja Parlamentu Nasionál (PN) ne’ebé antes ne’e hetan estragu husi deputadu sira, tenke iha rekonsiliasaun no hadi’a uluk relasaun entre deputadu sira.
“Meza ne’ebé baku fila iha PN hanesan preokupasaun ita hotu ni’an, tenke buka dalan hadi’a no rezolve, ha’u apresia tebes Prezidente PN iha ona planu atu harii hikas Meza PN ne’ebé baku fila”,Arsebispu Dioseze Díli ne’e ba jornalista sira hafoin enkontru ho Prezidente PN iha Kámara eklesiástika, Lecidere-Díli, Kuarta (01-07-2020).
Dom Virgílio apresia mós Prezidente PN, tanba iha ona planu atu harii fali meza PN ne’ebé hetan estragu husi deputadu balun, tanba de’it hadau malu kadeira, hodi hamonu dignidade nasaun.
“Meza PN baku fila la’ós rai lakan no anin mak sobu, maibé iha kazu mak hodi provoka malu no meza PN rahun, tanba ne’e, atu harii hikas tenke hadi’a uluk nia fukun mak harii hikas meza PN foun. Prezidente PN koko atu armoniza no hadi’a uluk relasaun, nune’e ita nia na’i deputadu sira mós bele rekoñese erru ne’ebé ita halo, hodi hatun dignidade PN ni’an meza hodi rekoñese. La’ós de’it bolu ita nia lia-na’in sira ka amu Bispu mai fó bensaun de’it, maibé tenke iha uluk rekonsiliasaun no hadi’a uluk relasaun, ita foin bele hadi’a hodi bele fó esperansa ba povu ida ne’e, hodi foti dignidade ita nia nasaun dalan mak ita tenke rekoñese buat ne’ebé aat soe ba kotuk, ita hamutuk hodi la’o ba oin“, apelu Dom Virgílio.
Prezidente PN, Aniceto Guterres, hateten, hafoin meza baku fila tuir planu PN sei harii hikas meza PN, iha loron 30, fulan Agostu, tinan ne’e.
“Ami sei koalia hela tempu sei kleur, ha’u informa ba tiha ona arsebispu Dioseze Díli, Dom Virgílio do Carmo da Silva kona-bá programa atu la’o oinsa, tempu sei iha ita sei koalia. Tuir ajenda fiksu husi PN atu harii hikas Meza PN baku fila iha loron 30, fulan Agostu, loron referéndum Timor-Leste ne’e sé laiha sirkunstasia impede”, tenik Prezidente PN ne’e.
Antes ne’e, iha loron 18, fulan Juñu liu ba mosu dezintendimentu iha sala plenária, bainhira bankada tolu (3) hanesan PLP, KHUNTO ho FRETILIN, obriga Vise Prezidente PN, Maria Angelina Sarmento atu lidera plenária, hodi halo votasaun ba destituisaun eis Prezidente PN, Arão Noe.
Maibé, tanba deputadu CNRT sira interompe no la autoriza Vise PN ba tuur iha kadeira Prezidente PN ne’ebé momentu ne’ebá eleitu husi deputadu koligasaun Aliansa Maioria Parlamentar (AMP), kompostu husi PLP, KHUNTO no CNRT nu’udar kadeira ne’ebé maioria iha PN hodi hahoris Governu da-ualu. ety
