Komunidade Aldeia Aidak Bihare, Suku Camea, Postu Administrátivu Cristo Rei, Munisípiu Díli, husu ba Padre sira atu kondena aktu krime ne’ebé mak grupu balun halo, hodi asaltu no tuda rahun estatua Na’in Feto no estatua Santo António rahun iha área refere.
Kazu ne’e akontese iha Domingu (13/07/20), mais ou menus tuku 08:00 dadersan.
Joãozinho de Ribeiro núdar sasin haktuir, kronolojia husi akontesimentu ne’e katak, kazu ne’e akontese wainhira, sira nia grupu hala’o hela ezersisiu, maibé derepente de’it hetan asaltu husi joven sira Bubur-Lau, hodi rezulta tuda uma rezulta estatua uma-laran Na’in Feto no Santo António rahun.
Tanba ne’e abitánte ne’e, lamenta hodi husu ba reprezentante igreja atu foti desizaun ruma ba akontesimentu ne’e.
“Ami lamenta, tanba ita-nia inan Na’in Feto no Santo António mós rahun, tanba ne’e mak ami husu ba líder boot sira no Amu Bispu atu foti desizaun la-lais”, esplika Joãozinho de Ribeiro ba GMN, Sesta (17/07/20), iha Fatu-Ahi.
Alende ne’e, Segundu Komandante PNTL munisípiu Díli, Superintendente Euclides Belo, hateten, husi akontesimentu ne’e PNTL detein ema na’in nen iha sela detensaun, maibé liu husi primeiru interogatoriu iha Tribunál Distritál Díli, ema na’in lima hetan liberdade no ema na’in ida mak aprezenta-an periodikamente iha PNTL kada semana.
“Ne’ebé ha’u atu dehan kazu ne’e la’os atu hotu de’it iha ne’e, signifika kazu ne’e prosesu ne’e sei kesi metin hela”, dehan Euclides Belo.
Alende ne’e, iha akontesimentu refere, grupu joven sira tuda rahun janela uma no inan ferik ida iha uma laran mós dau-daun ne’e sei trauma hela. avi
